Qaraǵandy oblysyndaǵy bas bostandyǵynan aiyrý mekemelerinde jazasyn ótep jatqan kitapqumar adamdarǵa jeńildik jasalady, dep habarlaidy "Ult aqparat".
QR IIM Qylmystyq atqarý júiesi departamenti (QAJD) baspasóz qyzmetiniń habarlaýynsha, óńirde jazasyn ótep jatqandar qazir shartty túrde merziminen bosatý jóninde ótinish berýdi kózdep otyr. Olardyń kópshiligi «Shekarasyz oqý» pilottyq jobasyna qatysqandar.
Biylǵy jyldyń qańtar aiynda Qaraǵandy oblysy boiynsha QAJD mekemesinde «Shekarasyz oqý» pilottyq jobasy iske qosyldy. Onyń maqsaty sottalǵandardy oqý mádenietine baýlý, qamaýda otyrǵandardyń saýatyn artyrý, sol arqyly olardyń túzelýine jaǵdai jasaý jáne yntalandyrý bolyp tabylady.
Biylǵy jyldyń 26 naýryzynda oblys boiynsha mekemelerde pilottyq jobany iske asyrý jónindegi komissiialardyń birinshi otyrysy ótti. Quramyna mamandandyrylǵan prokýratýrai, qoǵamdyq baqylaý komissiiasynyń ókilderi, qazaq jáne orys ádebietiniń oqytýshylary kirdi.
Qoǵamdyq tyńdaýdyń birinshi otyrysyna 48 sottalǵan qatysty. Pilottyq jobanyń sharttaryna sáikes jazasyn óteýshiler usynylǵan kórkem ádebiet shyǵarmalaryn oqyp, qaitalap, jeke áserleri, naqty oqylǵan kitapqa qatysty pikirleri bar esse usyndy, sonymen qatar qoiylǵan suraqtarǵa jaýap berdi. Komissiia oqý mádenietiniń dárejesin, onyń ishinde negizgi oidy túsiný, bólip kórsetý, buryn oqylǵanmen salystyrý, jeke qasietterdiń damýyn baǵalady.
«Qaraǵandy oblysy boiynsha QAJD basshylyǵyna atalmysh joba úshin alǵys aitqym keledi. Sonyń arqasynda meniń múgedek jubaiym shartty túrde merziminen buryn bosatýǵa ótinish bermek», - dep habarlady AK-159/7 mekemesinde jazasyn ótep jatqan sottalýshynyń jubaiy.
Joba komissiiasy otyrysynyń qorytyndysy boiynsha 30-dan astam sottalǵan adam marapattaldy.
