Qarmet kompaniiasynyń shahtalarynda kómirdi qurǵaq baiytýǵa arnalǵan zamanaýi keshender qurylysy jobasy júzege asyrylýda. Bul bastama óndiristiń tiimdiligin, ekologiialyq tazalyǵyn jáne tehnologiialyq deńgeiin arttyrýǵa baǵyttalǵan kompaniianyń aýqymdy jańǵyrtý baǵdarlamasynyń bir bóligi.
Joba birden tórt shahtada iske asyrylýda: «Shahtinsk», «Qazaqstan», «Abai» jáne T. Kúzembaev atyndaǵy shahta. Onyń negizgi mindeti – kómir sapasyn óndirý kezeńiniń ózinde jaqsartyp, shikizatty ári qarai óńdeýge daiyndaý.
Jańa keshender shaǵyn formattaǵy baiytý qondyrǵylary, iaǵni tolyq óńdeý tsiklin qamtamasyz etetin mini-fabrikalarlan turady. Ol shikizatty berý men usatýdan bastap baiytý jáne daiyn ónimdi qoimaǵa deiin jetkizýge deiin jumys isteidi. Ár keshenniń ónimdiligi saǵatyna shamamen 300 tonna, al joǵary deńgeidegi avtomattandyrý óndiristik protsesterdiń senimdiligi men turaqtylyǵyn arttyrýǵa múmkindik beredi.
Jobanyń negizinde sýdy paidalanýdy qajet etpeitin aýa arqyly bólý tehnologiiasy jatyr. Bul sheshim kómir baiytý tásilin túbegeili ózgertip, paidalaný shyǵyndaryn azaitady jáne qorshaǵan ortaǵa áserdi barynsha tómendetedi.
«Bul tehnologiianyń negizgi qaǵidasy – sýdan tolyq bas tartý. Kómir men jynysty bólý aýa aǵynyndaǵy tyǵyzdyq aiyrmashylyǵy arqyly júzege asady. Bul ekologiialyq qaýipsizdikti arttyrady, shyǵyndardy azaitady jáne klimattyq jaǵdaiǵa qaramastan jabdyqtyń turaqty jumysyn qamtamasyz etedi», — dedi «Shahtinsk» shahtasynyń kúrdeli qurylys jónindegi bas injeneri orynbasary Vasilii Barabanov.
Ekologiialyq aspektilerge erekshe nazar aýdarylǵan: sýdy paidalanýdyń bolmaýy suiyq qaldyqtardyń paida bolýyn boldyrmaidy, al bólingen jynys qosymsha óńdeýsiz-aq qaýipsiz túrde úiindige jiberiledi.
«Biz kómirdiń kúldiligin tómendetip, sonyń esebinen “Vostochnaia” ortalyq baiytý fabrikasynyń tiimdiligin arttyramyz. Óńdeýge budan da sapaly shikizat túsetin bolady», — dep qosty Vasilii Barabanov.
Keshenderge arnalǵan jabdyqtar jetkizilgen jáne qazirgi ýaqytta kedendik rásimdeýden ótýde. Aldaǵy ýaqytta qyzmetkerler jabdyqtaýshy kompaniia ókilderiniń qatysýymen arnaiy oqytýdan ótedi.
Jobany júzege asyrý Qarmet kompaniiasynyń kómir óndirý aktivterin júieli jańǵyrtýdyń bir bóligi bolyp tabylady. Kompaniia zamanaýi tehnologiialardy kezeń-kezeńimen engizý arqyly óndiris ónimdiligin, qaýipsizdigin jáne ekologiialyq standarttardy arttyryp, kásiporynnyń da, tutas salanyń da turaqty damýyn qamtamasyz etýde.
