Qarqaralydaǵy aýrýhanada segiz ailyq sábi kóz jumdy. Ata-ana dárigerlerdi der kezinde bilikti kómek kórsetpegeni úshin kinálap otyr, - dep habarlaidy Tengrinews.kz tilshisi.
17 qyrkúiekte segiz ailyq Ibragim qusyp, dene qyzýy kóterilip, ishi ótken. Ata-anasynyń aitýynsha, olar aýdandyq aýrýhanaǵa barǵan, biraq olarǵa tek dári-dármek jazyp berip, jaǵdaiy nasharlasa ǵana habarlasýlaryn suraǵan. Eki kúnnen keiin bala jedel járdem kóligimen Qarqaraly aýdandyq aýrýhanasyna jetkizilgen.
Balanyń tátesi bala nasharlaǵannan keiin dabyl qaǵyp, jergilikti dárigerlerden jedel járdem tikushaǵyn shaqyryp, náresteni Qaraǵandydaǵy oblystyq emhanaǵa jiberýdi suraǵanyn aitady.
"Meditsinalyq kómek der kezinde kórsetilmedi. 8 ailyq balaǵa tikushaq berilse, 40 minýtta jetetin edi. Biraq olar 4 saǵat júretin kólikti berdi", - deidi ol.
Oblystyq densaýlyq saqtaý basqarmasy qarqaralylyq dárigerler sanitarlyq aviatsiiany suraǵanyn málimdedi. Biraq bala tasymaldaýǵa jaramsyz bolǵan. Qaraǵandydan birneshe maman keldi. Biraq olar balaǵa kómektese almai, ol jansaqtaý bóliminde qaitys boldy. Oqiǵanyń mán-jaiy boiynsha Meditsinalyq jáne farmatsevtikalyq baqylaý komitetiniń departamentinde tergeý bastaldy.
"Aldyn ala sot-meditsinalyq saraptama anyqtalmaǵan eki jaqty pnevmoniia diagnozyn qoidy. Densaýlyq saqtaý basqarmasynyń qorytyndysy boiynsha "jedel ishek infektsiiasy" diagnozy qoiylǵan", - deidi Meditsinalyq jáne farmatsevtikalyq baqylaý komitetiniń bólim meńgerýshisi Olga Smirnova.
Bólimshedegiler diareia, dene qyzýynyń kóterilýi siiaqty belgilerdiń pnevmoniianyń saldary bolýy múmkin ekenin jáne olar Qarqaraly dárigerlerine habarlaýy kerek ekenin aitady. Balalardaǵy virýstyq infektsiialar ishek infektsiialaryna ainalýy múmkin. Alǵashqy qabyldaýda balany egjei-tegjeili tekserý úshin aýrýhanada qaldyrý kerek edi.
Balanyń tátesi týystarynyń politsiiaǵa aryz jazǵanyn atap ótti. Segiz ailyq Ibragim Aidarhan týǵan aýyly Qaraǵailyda jerlendi. Otbasy ádil tergeýdi suraidy.
