Foto: Úkimet
Qaraǵandy oblysy Shet aýdany Eńbekshil aýylynda jańa meditsinalyq pýnkt jumysyn bastady, dep habarlaidy Ult.kz.
Áleýmettik nysan Memleket basshysynyń aýyldyq jerlerdegi infraqurylymdy damytý jónindegi tapsyrmasyn júzege asyrý sheńberinde elge qaitarylǵan zańsyz iemdenilgen aktivter esebinen salyndy.
Meditsinalyq pýnkt 200-den astam turǵynǵa qyzmet kórsetýge arnalǵan jáne zamanaýi qural-jabdyqtarmen jaraqtandyrylǵan. Ǵimaratta dárigerge deiingi qaraý, tekserý jáne em-sharalar kabinetteri bar. Shuǵyl jaǵdailarǵa jedel den qoiý úshin mekemege aýdandyq aýrýhananyń reanimobil kóligi bekitilgen.
Shet aýdanynda ashylǵan meditsinalyq pýnkt óńirde qaitarylǵan aktivter esebinen júzege asyrylyp jatqan jalǵyz meditsinalyq joba emes. Jylandy aýylynda da jańa meditsinalyq pýnkttiń qurylysy júrýde.
Qaraǵandy oblysynda Arnaýly memlekettik qordan bólingen qarajatqa josparlanǵan 51 meditsinalyq mekemeniń 24-i salyndy, onyń 11-i paidalanýǵa berildi. Qalǵan 27 nysannyń qurylysy jalǵasýda. Olardy tapsyrý biyl qyrkúiek aiynyń sońyna josparlanyp otyr.
Jańa meditsinalyq nysandardy ashý boiynsha jumystar Prezident Qasym-Jomart Toqaevtyń bastamasymen qabyldanǵan «Aýylda densaýlyq saqtaýdy jańǵyrtý» ulttyq jobasy aiasynda júrgizilýde. Búgingi tańda 655 jobanyń 540-y júzege asyryldy.
