Qaraǵandy oblysynyń Shet aýdanynda jedel járdem kóligi avtojolda qar qursaýynda qalyp qoidy. Dárigerler aýyldan qalaǵa infarkt alǵan er adam men bosaný merzimi jetken júkti áieldi alyp kele jatqan, dep habarlaidy "Ult aqparat".
25 aqpanda Shet aýdanynda jedel járdem kóliginiń qar qursaýynda qalyp qoiǵany týraly habarlama kelip tústi. Oqiǵa ornyna qutqarýshylar shyqty.
«Qyzylqoi aýylyna qarasty «Almaty-Ekaterinbýrg» tasjolynda qar qursaýynda turyp qalǵan jedel járdem kóligi men jeńil avtokólikten 9 adam qutqaryldy. Qaraǵandy oblysynyń TJD jáne Apattar meditsinasy ortalyǵynyń kúshimen qutqarylǵan adamdar, onyń ishinde eki naýqas: infarkti bar er adam jáne bosanýǵa daiyndalyp júrgen júkti áiel Qaraǵandy qalasyna jol talǵamaityn kólikpen jetkizildi», - dep málimdedi Qaraǵandy oblystyq TJD baspasóz qyzmetinde.
