Almaty oblysynyń Qapshaǵai qalasynda «Eneverse Kunkuat» JShS-nyń «Nurǵisa 100 MVt Solar Park Qapshaǵai» kún elektr stansasynyń 100 megavattyq 1-shi kezegi iske qosyldy. Jańa nysannyń ashylý saltanatyna QR Premer-Ministriniń orynbasary Jeńis Qasymbek pen Almaty oblysynyń ákimi Amandyq Batalov qatysty, dep habarlaidy "Ult aqparat".
Aldymen jobanyń iske asyrylý kezeńderi men aldaǵy josparlary tanystyryldy. Kompaniia ókilderiniń aitýynsha, quny 27,7 mlrd. teńgelik jobany qarjylandyrýǵa «Qazaqstannyń Damý Banki» AQ-tyń qarajaty men «QDB-Lizing» AQ-nyń qarjylyq lizingi tartyldy. Al 10,4 mlrd. teńgesi - menshikti kapital, iaǵni nysanǵa salynǵan investitsiia. Óz kezeginde kásiporynnyń iske qosylýyna jergilikti atqarýshy bilik qoldaý bildirip, «Biznestiń jol kartasy - 2020» baǵdarlamasy arqyly joǵary voltty jelilerdiń qurylysyn oblystyq biýdjetten 233 mln. teńgege qarjylandyrǵan.
Saltanatty jiynda kópshilikti mańyzdy nysannyń ashylýymen Úkimet basshysynyń orynbasary Jeńis Qasymbek quttyqtady:
- Almaty oblysynda elektr energiiasynyń tapshylyǵy bar. Sondyqtan búgin iske asyrylyp otyrǵan iri jobanyń mańyzy zor dep esepteimin. Bul joba ainalasy bir jyldyń ishinde iske qosyldy. Jalpy elimizde «Ekspo – 2017» kórmesi alternativti energetika jobalarynyń qarqyndy júzege asyrylýyna zor serpin berdi. Búgingi kúni respýblikada 70-ten astam elektr óndiretin nysan bar. Sonyń 20-dan astamy Almaty oblysynda. Bul jaǵynan oblys kóshbasshy sanalady. Qazirgi kezde Qazaqstanda 800 MVt elektr qýaty jańartylǵan energiia kózderinen alynyp otyr. Sondai taǵy 5 nysan ashý josparlanǵan. Bizdiń biznesmender kún elektr stansasyn iske qosýǵa bar kúsh-jigerin saldy. Úkimet tarapynan da qajetti qoldaý sharalary kórsetildi. Osyndai jobalardyń arqasynda elimizde óndiriletin elektr energiiasyndaǵy JEK úlesi 3 %, 2030 jylǵa qarai 10 % jetkiziledi. Osy jobaǵa atsalysqan azamattardyń bárine alǵys aitamyn, - dedi J.Qasymbek.
Oblys ákimi Amandyq Batalov bilik pen biznestiń ózara yntymaqtasa jumys isteýi zor nátijeler berip otyrǵanyn, búgingi nysannyń ashylýy sonyń bir aiǵaǵy ekenin aitty.
- Almaty oblysy ekonomikanyń barlyq baǵytynda jaqsy damyp keledi, indýstrialdy aimaqtar qurylyp, jańa nysandar ashylýda. Jańadan iske qosylǵan iri kásiporyndardyń barlyǵy qoljetimdi elektr qýatyn qajet etedi. Búgingi ashylyp otyrǵan kún elektr stansasy oblysty elektr qýatymen qamtamasyz etýge úles qosatyn mańyzdy nysan bolmaq. Bul – Soltústik-Ońtústik elektr taratý jelisiniń boiynda turǵan iri nysan. Sonymen birge jobanyń júzege asyrylýy jańa jumys oryndarynyń ashylýyna, biýdjetke salyq túsiminiń jáne óńirge tartylǵan investitsiia kóleminiń artýyna septigin tigizedi. Onyń nátijesi oblys ekonomikasyna oń yqpal etip, igiligin halyq kóredi. Osy istegi seriktesterimizge rizashylyǵymdy bildiremin. Bilik pen biznestiń birigip jumys isteýi óz jemisin berip otyr, - dedi A. Batalov.
«ENEVERSE KUNKUAT» kompaniiasynyń quryltaishylary Bolat Abilov pen Oraz Jandosov kórsetilgen memlekettik qamqorlyqqa rizashylyǵyn aityp, qarjylai qoldaý kórsetken, stansa qurylysyn júrgizgen kompaniialarǵa, qurylysshy-jumysshylarǵa alǵystaryn jetkizdi.
Resmi qonaqtar kún elektr stansasynyń simvolikalyq tetigin basyp, iske qosty.
Sol siiaqty osy sharada kompaniia ókilderi Qapshaǵai qalasynyń áleýmettik nysandaryn damytýǵa 250 mln. teńgeniń sertifikatyn syiǵa tartty. Bul rette kelesi jyly Qapshaǵai qalasynyń 50 jyldyǵy ótetinin atap ótý kerek.
Eske salsaq, kún elektr stansasynyń «Nurǵisa 100 MVt Solar Park Qapshaǵai» degen ataýy belgili kompozitor Nurǵisa Tilendievtiń qurmetine qoiylǵan. Joba jyl saiyn 160 mln. kVt/saǵ elektr energiiasyn óndiredi. KES atmosferaǵa SO2 shyǵaryndylaryn jylyna 150 myń tonnaǵa azaitady.
KES-tiń aýmaǵy 400 gektardy alyp jatsa, jobanyń 1-shi kezeńi 274 gektarda ornalasqan. Stansada jalpy sany 303 myń panel ornatylady. Nysannyń 1-shi kezeginiń qýaty 100 MVt bolsa, tolyq qýatyna shyqqanda 150 MVt elektr qýatyn óndiretin bolady.
KES-ti salýǵa 11 otandyq merdiger kompaniia qatysqan. Olardyń arasynda «Amanat», «ASPMK-519», «Nazar Enerdji», «Tengizstroi» jáne basqa da kompaniialar bar. Stantsiia qurylysyn júrgizýde jergilikti turǵyndardan 500-den astam adam jumys istedi. Nysan iske qosylǵanda 35 adamdy jumyspen qamtidy.
