AQSh soty biyl qańtarda "baqsy kiiminde Kapitoliige basyp kirgen" Arizona shtatynyń turǵyny Djeikob Chenslidi úsh jyl bes aiǵa bas bostandyǵynan aiyrdy.
Aiyptaý taraby baqsyǵa tórt jyldan astam jaza suraǵan. Advokattar on aiǵa túrmege qamaýdy ótingen. Qorǵaý tarabynyń aitýynsha, Chensli "baiaý aǵymdy shizofreniia", ýaiym-qaiǵy men depressiiaǵa shaldyqqan. Sottalýshy kinásin moiyndady.
Chensli Kapitoliidegi tártipsizdik kezinde múiizi bar tymaq kiip, erekshe kostiýmimen kózge túsken. Ol senat ǵimaratynda vitse-prezidenttiń ústeline otyryp, sýretke túsken. Onyń barlyǵy aqparat quraldary men áleýmettik jelige keńinen taraldy.
Ol 9 qańtarda ustaldy. Sol kúni oǵan Kapitoliige qasaqana túrde basyp kirip, qoǵamdyq tártipti buzdy degen aiyp taǵyldy. Artynsha qamaldy.
Prezident Donald Tramp jaqtastary 6 qańtarda Kapitolii ǵimaratyna basyp kirip, demokrat Djo Baidenniń prezident sailaýyndaǵy jeńisin bekitpek bolǵan senat otyrysyna kedergi keltirgen. Shtýrmnan keiin bes adamnyń qaza bolǵan belgili boldy. Arasynda bir politsiia ofitseri bar.
Kapitoliidegi oqiǵanyń aldynda sol kúni Donald Tramp Aq úige jaqyn aýmaqta jaqtastarynyń aldynda sóz sóilegen. Ol "prezident sailaýynyń nátijesi burmalanǵanyn" aityp, sotta zańgerleri dáleldei almaǵan tujyrymdardy jetkizgen.
