Qańtardaǵy qamaýǵa alý tártipsizdikterdiń aldyn alý úshin basym sheshim bolǵanyn moiyndaý kerek. Bul týraly Májilistiń jalpy otyrysynda Qazaqstandaǵy Adam quqyqtary jónindegi ýákil Elvira Ázimova aitty, dep habarlaidy QazAqparat.
«Elimizde «Adam quqyqtary jónindegi ýákil týraly» Zań qabyldandy. Osy Zań tótenshe jaǵdai kezinde bizge kómegi naqty tidi. Sebebi biz Zań aiasynda biraz monitoring jumysyn júrgizdik. Onyń ishinde 33 monitoring is-sharasy aiasynda ustalǵandardyń eń kóp sany jáne buzýshylyqtar týraly habarlama túsken 8 qalaǵa erekshe nazar aýdardyq. Olar: Almaty, Taldyqorǵan, Óskemen, Shymkent, Atyraý, Taraz, Qyzylorda jáne Semei. Osy arada quqyq qorǵaýshylarmen táýlik boiy bailanysta boldyq. Táýelsiz monitoring tek ustalǵandarmen kezdesýdi ǵana emes olardyń týystarymen kezdesýlerdi, prokýratýra, politsiia jáne ákimdikter basshylyǵymen kezdesýlerdi de qamtydy. Qazirgi ýaqytta quqyq qorǵaý organdary, atap aitqanda prokýratýra quqyq qorǵaýshylarmen ashyq áriptestikke daiyndyǵyn kórsetti. Bul eleýli progress», - dedi ol qańtar oqiǵalaryna qatysty máseleler kóterilgen otyrysta.
Sonymen birge ol qańtardyń basynda ustaý mekemelerindegi aýyz sýǵa, tamaqtanýǵa qatysty problemalar jáne ustalǵandardyń bolýy úshin qajetti qural-jabdyqtardyń joqtyǵy týraly habarlamalar tirkelgenin aitty.
«Qazirgi tańda osy faktiler boiynsha sotqa deiingi qýdalaý jalǵasýda. Dene jaraqatyn alǵan azamattar ýaqytsha ustaý izoliatorynda 5-9 qańtar aralyǵynda alǵashqy meditsinalyq kómek kórsetilmegendigi týraly habarlady. 9 qańtarda Almatyda azamattyq aýrýhanada bolǵan azamattardy ýaqytsha ustaý izoliatoryna qamaýǵa alý qoǵamdyq rezonans týdyrdy. Meditsinalyq qamtamasyz etý týraly kelissózderden keiin 29 jaraly adam azamattyq aýrýhanalarǵa aýystyryldy. Ustalǵandardyń qalǵandaryna aýrýhanalarǵa jatqyzý qajettiliginiń joqtyǵy týraly meditsinalyq qorytyndy negizinde azamattyq dárigerlerdiń turaqty túrde barýy uiymdastyryldy. Sondai-aq qańtar aiynda qamaýǵa alý tártipsizdikterdiń aldyn alý úshin basym sheshim bolǵanyn moiyndaý kerek», - dedi Elvira Ázimova.
