Qańtar oqiǵasy boiynsha 421 kúdiktige qatysty bultartpaý sharalary qoǵamnan oqshaýlaýmen bailanysty emes jazaǵa ózgertildi. Bul týraly QR Ishki ister ministrligi Tergeý departamentiniń basshysy Sanjar Ádilov aitty, dep habarlaidy QazAqparat.
«Buryn sottylyǵy bolmaǵan, shyǵyndy óz erkimen ótegen 421 kúdiktige qatysty bultartpaý sharalary qoǵamnan oqshaýlaýmen bailanysty emes jazaǵa ózgertildi. Budan ári olarǵa eshqaida ketpeý qolhaty, kepil, úiqamaqta ustaý siiaqty sharalary qoldanyldy. Ortasha jáne onsha aýyr emes qylmys jasaǵan, sondai-aq jábirlenýshilerge keltirilgen shyǵyndy ótegen 35 kúdiktige qatysty qylmystyq is qysqartyldy», - dedi Sanjar Ádilov Ortalyq kommýnikatsiialar qyzmetinde.
Onyń aitýynsha, óz kezeginde sottar da jaza taǵaiyndaǵan kezde tergeý málimetterimen qatar, sottalýshylardyń óz ustanymyn, ókinish bildirýin, shyǵyndy ótegenin jáne tergeýge járdem kórsetkenin de eskerýde.
«Almaty oblysynyń eki turǵyny Almaty qalasyndaǵy jappai tártipsizdik kezinde Abylai han dańǵylyndaǵy dúkenderdiń birinen jarty million teńgeden astam somanyń taýaryn urlaǵan. Sot aiyptalýshylardyń jeke basyn minezdeitin málimetterdi, jasaǵan áreketine ókinish bildirýin jáne shyǵyndy ótegenin eskere otyryp, 2 jylǵa bas bostandyǵyn shekteý úkimin shyǵardy», - dedi vedomstvo ókili.
