Qańtar oqiǵasyna uiymdasqan qylmystyq toptar, destrýktivti dini aǵymdardyń músheleri qatysqan. Bul týraly QR Bas prokýratýrasy Arnaiy prokýrorlar qyzmeti bastyǵynyń orynbasary Nurlybek Sábitov aitty, dep habarlaidy QazAqparat.
«Bas prokýratýra qańtar oqiǵalaryna bailanysty qylmystyq isterdi tergeý barysy týraly habarlaýdy jalǵastyrýda. Jalpy osy oqiǵalardyń nátijelerinde elimizde 5 myńnan astam sotqa deiingi tergep-tekserýler tirkeldi. Qiratýlar, memlekettik obektilerdi órteý, múlikterdi joiý jáne terrorizm aktileri Almaty, Shymkent qalalarynda, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda jasalǵany belgili», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, sol qaiǵyly kúnderi qylmyskerler áskerilerge shabýyl jasap, joldyń júrý bóligin japqan, avtokólikterdi órtep, azamattardy tártipsizdikterge qatysýǵa kóndirgen jáne tonaýlar jasaǵan.
«Qoǵamdyq qaýipsizdik pen quqyqtyq tártipti qamtamasyz etýdi buǵattaý úshin olar politsiia organdarynyń ǵimarattaryna shabýyldar jasady. Jappai tártipsizdikterge uiymdasqan qylmystyq toptar, destrýktivti dini aǵymdardyń músheleri jáne buryn sotty bolǵan adamdardyń qatysqanyn arnaiy prokýrorlar anyqtady. Búgingi kúni barlyq qylmystyq ister boiynsha 286 kúdikti qamaýda. Olardyń qiratýlarǵa, ǵimarattardy órteýge, qarýlardy jymqyrýǵa, memlekettik obektilerge jáne quqyq qorǵaý organdary qyzmetkerlerine qarýly shabýyl jasaýǵa belsendi qatysqany anyqtaldy», - dedi Nurlybek Sábitov.
Bas prokýratýra ókiliniń málimetinshe, árbir qamaýǵa alynǵan adam boiynsha olardyń qylmystarǵa qatystylyǵy týraly jetkilikti málimetter bar. Olardyń barlyǵyna qorǵalý quqyǵy, sanitarlyq normalar, tamaqtaný, dári-dármekter jáne ustaýdyń tiisti jaǵdailary qamtamasyz etilýde», - dedi ol.
