Eńbek daýlary ereýilge ulaspaýy úshin kásipodaqtar men jergilikti máslihattar belsendi jumys isteýi kerek. QR Prezidenti janyndaǵy strategiialyq zertteýler institýtynyń bólim jetekshisi QazAqparattyń suhbat alańynda osyndai oi aitty, dep habarlaidy QazAqparat.
«Búginde biz demokratiialyq qoǵamda ómir súrýge tyrysyp jatyrmyz. Bárin de demokratiialyq printsiptermen qurǵymyz keledi. Biraq qoǵam tarapynan jasalyp jatqan biraz áreketter demokratiiaǵa emes, ohlokratiiaǵa jaqyndaý bolyp tur. Sebebi, demokratiia degenimiz – ókildik printsiptiń saqtalýy. Al ohlokratiia – adamdardyń tikelei shyǵyp, tobyr retinde bilik ornatýy. Ekeýi uqsas negizi. Basty aiyrmashylyǵy – demokratiiada ókildik printsiptiń bolýy. Qazir azamattar qalaýyn memleketke tikelei aityp jatyr. Sebebi eki ortadaǵy ókildi organdardyń jumysy durys rettelmegen. Ókildi organ retinde ne máslihat depýtattary, ne kásipodaqtar shyǵýy kerek. Osy eki institýt mindetin durys atqarsa, eńbek ujymdaryna búgingidei toptasyp alyp, memleketke tikelei talap joldaýdyń qajeti de bolmaityn edi. Ár uiymnyń kásipodaǵy bolýy kerek. Kásipodaq sol uiymnyń basshylyǵymen kelissóz júrgizip, jumysshylardyń quqyǵyn qorǵaýy kerek», - dedi sarapshy.
Zertteýshi elimizde kásipodaqtardyń úlken saiasi institýtqa ainalýy úderisi áli aiaqtalyp bolǵan joq dep esepteidi.
«Kásipodaqtar bar, biraq óziniń bastapqy fýnktsiiasyn tolyqqandy atqarmai otyr. Kásipodaq degen tek týǵan kúnder men merekelik quttyqtaý ótkizetin uiym bolyp qalmaýy kerek. Mysaly, qańtardaǵy oqiǵa kezinde Jezqazǵandaǵy jumysshylardyń qoiǵan talaby 15 tarmaqtan turdy. Eńbekaqy mólsheri, qosymsha tólenetin ústemeaqy kólemi, densaýlyq saqtaý sharalary men eńbek jaǵdaiy degen siiaqty kásipodaqpen birlesip retteitin máselelerdi qamtydy. Onyń bárine memleket tikelei aralaspaýy kerek. Demokratiialyq qoǵamdy tolyqqandy qurǵymyz kelse, soǵan sai saiasi institýttardyń tolyqqandy fýnktsionaldy jumys isteýine múmkindik berýimiz kerek», - dedi Indira Rystina.
