Qańtar oqiǵasyn tergeý nátijesi boiynsha sotqa 474 qylmystyq is joldanyp, 717 adam sottaldy. Bul týraly ortalyq kommýnikatsiialar qyzmeti alańynda Qazaqstan bas prokýratýrasy arnaiy prokýrorlar qyzmeti bastyǵynyń orynbasary Nurlybek Sábitov málimdedi, dep habarlaidy Sputnik Qazaqstan.
Onyń aitýynsha, búgingi kúni barlyq qylmystyq is boiynsha 286 kúdikti qamaýda otyr.
"Qańtarda oqiǵacy boiynsha sotqa barlyǵy 474 qylmystyq is joldandy, olar boiynsha 717 adam sottaldy. Memleket basshysynyń jazany jeńildetý jónindegi tapsyrmasyn oryndaý maqsatynda aýyrlatatyn mán-jailar bolmaǵan kezde prokýrorlar sottardan bas bostandyǵynan aiyrýmen bailanysty emes jazalardy taǵaiyndaýdy suraidy", – dep habarlady Nurlybek Sábitov.
Mysaly, Taraz qalasy sotynyń úkimimen Jambyl oblysy politsiia departamentinen urlanǵan "Makarov", "Stechkin" júiesiniń jaýyngerlik tapanshalaryn jáne oq-dárilerdi saqtaǵany jáne tasymaldaǵany úshin jergilikti turǵyn sottaldy.
"Azamat óz kinásin moiyndap, jasaǵan isine ókinip, sotqa deiingi tergeý kezinde tergeý organdaryna kómek kórsetti. Osy jaǵdailardy eskere otyryp, oǵan eki jylǵa bas bostandyǵyn shekteý jazasy kesildi", - dedi bas prokýratýra ókili.
Nurlybek Sábitov qarýdy urlaýmen jáne saqtaýmen bailanysty aýyr qylmys jasaǵan, zalaldy ótemegen jáne ótelmegen sottylyǵy bar 92 sottalýshy bas bostandyǵynan aiyrýdyń naqty merzimin alǵanyn jetkizdi.
