Aqtóbe-Atyraý-Astrahan baǵytyndaǵy halyqaralyq joldaǵy jóndeý jumystary kólik ielerine 500 shaqyrym joldy únemdeýge múmkindik beredi, dep habarlaidy QazAqparat.
Úkimet otyrysynda Indýstriia jáne infraqurylymdyq damý ministri Beibit Atamqulov Aqtóbe-Astrahan baǵytyndaǵy joldyń jaiyna toqtaldy.
«Aqtóbe-Atyraý-Astrahan baǵytyna erekshe nazar aýdarǵym keledi. Qaita jańartý jumystary bastalǵanǵa deiin avtojoldyń nasharlyǵynan Aqtóbe men Atyraý, Aqtaý qalalary arasyndaǵy qatynas Oral qalasy arqyly júzege asyrylatyn. Iaǵni, 500 shaqyrym artyq jol júretin. Qazir bul avtojoldyń boiynda qurylys jumystary qarqyndy júrgizilip jatyr. Biyl Qandyaǵash-Maqat (327 shaqyrym) ýchaskesinde jumystardy aiaqtap, jolda qozǵalys ashylady. Al kelesi jyly tolyq paidalanýǵa beremiz», - dedi ministr.
Onyń sózine qaraǵanda, biyl Túrkistan, Jambyl oblystaryn ortalyq óńirlermen tikelei bailanystyrý jumystary qarqyn alýy tiis.
«Bul óńirler men kórshi memleketter elimizdiń ortalyǵyna saparlaý úshin Almaty qalasy arqyly, 250 shaqyrym artyq jol júredi. Sondyqtan, Merki-Býrylbaital avtojolynyń áleýmettik mańyzy zor jáne ol Ortalyq Aziia elderimen tranzitke áser etedi. Biyl jolda negizgi jumystardy aiaqtap, qozǵalysty ashýdy (262 shaqyrym) josparlap otyrmyz», - deidi Beibit Atamqulov.
