Qandastar Qazaqstan azamattyǵyn alǵannan keiin ǵana aýyl sharýashylyǵy jerin jalǵa ala alady. Bul týraly búgin QR Aýyl sharýashylyǵy vitse-ministri Rústem Qurmanov aitty, dep habarlaidy QazAqparat.
«2016 jyldyń 6 mamyrynda jer kodeksiniń keibir normalaryna moratorii engizildi. Moratorii merzimi 2021 jyldyń 31 jeltoqsanynda aiaqtalady. Moratoriimen aýyl sharýashylyǵy jerlerin sheteldikterge, azamattyǵy joq adamdarǵa, sheteldik kompaniialarǵa, sondai-aq sheteldik úlesi bar qazaqstandyq kompaniialarǵa jalǵa berýge shekteý qoiyldy. Moratorii merzimi aiaqtalatyndyǵyna bailanysty QR Prezidenti Qasym-Jomart Toqaev osy jyldyń 25 aqpanynda Ulttyq qoǵamdyq senim keńesiniń 5-otyrysynda aýyl sharýashylyǵy jerlerin sheteldikterge jáne sheteldik kompaniialarǵa, sheteldik úlesi bar qazaqstandyq kompaniialarǵa, azamattyǵy joq adamdarǵa, halyqaralyq qatysýy bar ǵylymi ortalyqtarǵa, sondai-aq qandastarǵa berýge tolyq tyiym salý týraly saiasi sheshim qabyldady», - dedi vitse-ministr «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrý engizý týraly» zań jobasy jónindegi jumys tobynyń otyrysynda.
Onyń atap ótýinshe, Májiliske engizilgen jer qatynastary máseleleri boiynsha zań jobasynda moratoriige deiin sheteldikter men sheteldik úlesi bar qazaqstandyq kompaniialar jalǵa alǵan aýyl sharýashylyǵy jerlerin paidalaný merzimi uzartylmaidy.
«Alaida, paidalaný merzimi aiaqtalǵanǵa deiin qoldana alady. Sondai-aq qandastar qosalqy sharýashylyq, baý-baqsha jáne saiajai qurylysy úshin jer ala alady. Biraq, aýyl sharýashylyǵy jerin Qazaqstan azamattyǵyn alǵannan keiin ǵana jalǵa alýǵa múmkindigi bar», - dedi Rústem Qurmanov.
