«Qandas» mártebesin alýǵa úmitker adamdardyń óz qujattarynda ulty týraly jalǵan málimet berý faktileri bar. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Keibir elderde (mysaly, Aýǵanstan, Iran, Irak, Pákistan) berilgen pasporttarda jáne jeke basty kýálandyratyn basqa qujattarda azamattyń ulty kórsetilmeitinine bailanysty jeke etnikalyq qazaqtar ózderiniń qazaq ultyna qatystylyǵyn dáleldeýde problemaǵa tap bolady. «Qandas» mártebesin alýǵa úmitker adamdardyń óz qujattarynda ulty týraly jalǵan málimet berý faktileri bar», - dedi Úkimet basshysy.
Onyń aitýynsha, atalǵan máseleni retteý úshin Eńbek jáne halyqty áleýmettik qorǵaý ministrligi «Halyqtyń kóshi-qony týraly» Zańǵa: kóshi-qon máselesi boiynsha ýákiletti organnyń jeke basty kýálandyratyn qujattarda tiisti jazbalar bolmaǵan jaǵdaida «qandas» mártebesin alýǵa úmitker adamdardyń qazaq ultyna qatystylyǵyn anyqtaý qaǵidalaryn ázirleýge jáne bekitýge; respýblikalyq mańyzy bar oblystardyń, qalalardyń, astananyń jergilikti atqarýshy organdarynyń jeke basty kýálandyratyn qujattarda tiisti jazbalar bolmaǵan jaǵdaida «qandas» mártebesin alýǵa úmitker adamdardyń qazaq ultyna qatystylyǵyn anyqtaý týraly sheshim qabyldaý quzyretterin kózdeitin túzetýlerdi pysyqtaýda.
«Úkimettiń zań shyǵarý qyzmeti aiasynda tiisti jumys júzege asyrylýda», - dedi Asqar Mamin.
