Búgin kásipqoi boksshy Qanat Islam bastaǵan «QAZAQ promotions» promoýterlik uiymy «El-Nesibe» Qaiyrymdylyq qory» qoǵamdyq qory arqyly 8 balasy bar jalǵyzbasty anaǵa 2 bólmeli páter syilady, dep habarlaidy "Ult aqparat".
Promoýterlik uiymnyń málimetinshe, páter Nur-Sultan qalasynyń oń jaǵalaýynda Saryarqa aýdanynda ornalasqan. Baspana kópbalaly otbasyǵa yńǵaily bolýy úshin irgesinde ornalasqan mektep jáne balabaqshanyń jaqyndyǵyna orai arnaiy tańdaldy. Sondai-aq, páterdiń ishi turmysqa qajetti barlyq tehnikalarmen, tósek-orynmen tolyq jabdyqtalǵan.
Páterdiń kiltin jalǵyzbasty ana Gúlshat Baiadilovaǵa qazaq kásipqoi boksynyń jaryq juldyzy, WBO Inter-Continental chempiony Qanat Islam ózi tapsyrdy. Kópbalaly otbasy sońǵy sekýndtarǵa deiin baspanaly bolatynyn, onyń kiltin qazaqtyń maqtanyshy Qanat Islam tapsyratynyn bilmegen. Barlyǵy qupiia retinde saqtalǵan. Ómirde kóptegen qiyndyqtarǵa kezdesip, moiymaǵan anaǵa tosynsyidy «El-Nesibe» Qaiyrymdylyq qory» qoǵamdyq qorynyń ókilderi arnaiy uiymdastyrǵan.
Gúlshat Baiadilova – «Kúmis alqa» iegeri, 8 balany ómirge ákelip, er jetkizgen. Balasynyń aldy turmys quryp, jeke otbasy bolyp otyr. Ekinshi balasy naýqas, qarjynyń tapshylyǵynan meditsinalyq kómek ýaqytyly kórsetilmegendikten, naqty diagnozy anyqtalmaǵan. Úshinshi balasy kolledj stýdenti, al qalǵan 5 balasy mektep oqýshylary. Osy ýaqytqa deiin jer úidiń aiadai bir bólmesin panalap kelgen. Páterge tóleitin qarajaty bolmaǵandyqtan, záýlim kottedjdiń qysta otyn jaǵyp, jazda kúlin tógip, aýlany tazalap, basqa da jumystar istegeni úshin tegin turǵan. «Klýb dobriakov» kómek retinde, holodilnik, gaz plitasyn, tósek, divan ákelip bergen. Oǵan deiin jerge jatyp júrgen eken.
Baspananyń zardabyn tartyp kelgen januia jaǵdaiy týraly bilgen «El-Nesibe» Qaiyrymdylyq qory» qoǵamdyq qorynyń ókilderi jan-jaqtan kómek surastyra júrip, qazaqtyń jomart peiildi jaýjúrek uly Qanat Islamǵa osy jaidy jetkizedi. Ol QR Prezidenti Qasym-Jomart Toqaevtyń tikelei qoldaýymen 5 shildede Almatyda ótken «Qanat Islammen boks keshi» atty sharadan jinalǵan qarjynyń bir bóligine kópbalaly otbasyǵa baspana alyp berýdi uiǵarǵan.
