Ýilmington qalasynda (AQSh, Delaver shtaty) WBO Intercontinental jáne WBA Fedelatin tujyrymdary boiynsha Álem chempiony, birinshi orta salmaqtaǵy Qanat Islam (22-0-0, 18 KO) men braziliialyq Robson Assis (16-3-0, 9 KO) arasyndaǵy jekpe-jek aiaqtaldy, dep xabarlaidy "Ult aqparat".
Jekpe-jek nebári bir raýndtqa sozyldy. Qanat kezdesýdi qarqyndy bastady. Alǵashqy sátterdiń birinde-aq qabaǵyn jaraqattap alǵan boksshymyz qarsylasyn buryshtan buryshqa qýalap júrip, soqqylaryn darytty. Raýndtyń sońǵy sekýndtarynda Qanattyń oń qolymen sermegen judyryǵy qarsylasyn shalqasynan qulatty. Bul soqqydan Robson eseńgirep, tura almady.
Kezekti jeńisinen keiin qazaqstandyq boksshy qazaqstandyqtarǵa alǵysyn aitty. Qanat Islamnyń sózinshe, oǵan jaraqatyna bailanysty jekpe-jekti birden aiaqtaý kerek bolǵan. Osylaisha, otandasymyz birinshi raýndta bar kúshin salyp, kezdesýdi óz paidasyna sheshýdi tyrysty. "Barlyǵy biz josparlaǵandai boldy. Endi bizdi Astanada taǵy úlken jekpe-jek kútip tur. Elbasy Astanada EXPO kezinde jekpe-jek ótkizýge shaqyrdy. Alǵysym sheksiz!", - dedi qazaqstandyq boksshy dúiim jurtqa alǵys bildire otyryp.
Boksshylardyń kezdesýi kishi Roi-Djonstyń boks keshiniń aiasynda ótken bolatyn. Bul álemge «Qazaq» degen atpen tanylǵan Qanat Islamnyń kásipqoi ringtegi 23-shi kezdesýi.
Aita keteiik, búgingi reitingtik jekpe-jek 10 raýndqa josparlanǵan.
