Májilistiń jalpy otyrysynda depýtat Abilfas Hamedov turmystyq qaldyqtardy jinaýdaǵy problemany kóterdi, dep habarlaidy QazAqparat.
«Problemalardyń biri qatty turmystyq qaldyqtardy suryptaý men qaita óńdeýge bailanysty. Jyl saiyn Qazaqstanda 5 mln tonna qatty turmystyq ári qurylys qaldyqtary jinalady. Alaida suryptaý pýnkteri tek 40 paiyzǵa júktelgen. Óńdeýshi kásiporyndar shikizattyń budan artyq kólemin qabyldaýǵa ázir, alaida qatty turmystyq qaldyqtar bólektep jinaý júiesinen ótýi kerek. Bul jumystar elimizde tiisti deńgeide emes. Al qurylys alańdarynan shyǵarylǵan qaldyqtar óńdelmei, shuńqyrly jerlerge tógilip keledi», - dedi Abilfas Hamedov Úkimet basshysynyń orynbasary Roman Skliardyń atyna joldaǵan saýalynda.
Onyń paiymynsha, qaldyqtardyń túrli tipteri úshin arnaiy konteinerlerdi ornatý qoqysty iriktep jinaýdy jeńildetip, qaita óńdeýdegi shyǵyndardy azaitýǵa múmkindik beredi.
«Qazaqstanda 3030 poligon bar, onyń ishinde qatty turmystyq qaldyqtardyń 600 poligony ekologiialyq ári sanitarlyq normalarǵa sai keledi», - dedi depýtat.
Osy oraida ol atalǵan salada ruqsat berý rásimderin jeńildetý múmkindigin qarastyrýdy surap, sondai-aq qajetti óndiristerge jer telimderin bólýge qatysty usynys aitty.
