Aqtóbe qalasynyń ákimi qoǵamdyq keńes jáne BAQ ókilderimen kezdesip, qala ishinde atqarylyp jatqan isterdi aityp berdi, dep habarlaidy "Ult aqparat".
«Búgingi kúnde qalamyzdyń qarjylyq jaǵdaiy óte qiyn. Sebebi ataýly áleýmettik kómekti buryn Aqtóbe qalasynda 1 500 adam alsa, qazir olardyń sany 10 myńǵa jetti. Iaǵni, 7-8 ese kóp. Oǵan qarjy bólindi. Az qamtylǵan, kópbalaly otbasylar da bar. Turǵyn úi salý qajet. «Báiterek» holdinginen qarjy alyp, úi salyndy. Ony óteý úshin oblystyq biýdjet qalalyq biýdjetten 10 qazanǵa deiin aqsha aýdarýǵa tapsyrma berdi. Soǵan 13,5 milliard teńge aqshany respýblikaǵa tóledik. Búgingi kúnde qaladaǵy araq zaýyty qyzmetin toqtatyp, qala biýdjetine 7-8 milliard teńge túspei otyr. Sáikesinshe tabys azaiǵan kezde kei salalardaǵy jumysty ýaqytsha toqtatýǵa týra keldi. Keibirinen aqshany keri qaitaryp alyp jatyrmyz. Ol da ońai jumys emes. Jyl sońyna deiin tek memlekettik qyzmetkerlerdiń jalaqysyn tólei alamyz», - dedi qala ákimi Mavr Abdýllin.
Shahar basshysynyń aitýynsha, jalaqy qaryzy bolmaidy. Qazirgi kezde keler jyldyń jospary jasalyp jatyr.
«Qaladaǵy aialdamany ózgertý kezinde biýdjetke salmaq salmai, jeke kásipkerlerdiń kómegimen shyǵýǵa májbúr bolyp otyrmyz. Aldaǵy ýaqytta jol, qala sáýleti boiynsha jobalar kópshilikke usynylady. Saraptalyp, taldaý jasalady. Jyl aiaǵyna deiin qalanyń damýy boiynsha barlyq usynysty qabyldaimyz. Keler jyldan bastap jumys atqaramyz. Ol jumysty da qarap, qadaǵalaý úshin qoǵamdyq baqylaý kerek bolady. Ár sala, ár baǵyt boiynsha jumys toby qurylady. Qala ózimizdiki. Qalanyń ádemi kórikti bolýy úshin tek ákimdik emes, qala turǵany atsalysýy tiis. «Ákimdik qaida qarap otyr, nege jasamaidy» dep aitatyn bolyp kettik. Sondyqtan biýdjetten jaǵdaiyn ashyq aityp otyrmyz», - dedi Mavr Abdýllin.
