2021 jyldyń 4 aiynda avtobýs kóligimen 1,8 mlrd jolaýshy tasymaldandy. Bul týraly halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«2021 jyldyń 4 aiy ishinde avtomobil kóligimen 860 mln tonna júk, 1,8 mlrd jolaýshy tasymaldandy. Búginde 10,5 myń qalalyq avtobýstyń 46 paiyzy tozǵan, jyl saiyn 2 myńyn jańartý qajet. Osyǵan orai biyl jeńildetilgen lizing boiynsha 22 mlrd teńge bólindi, ol qarajattan jyl basynan beri 3 óńirge 383 otandyq avtobýs jetkizildi», - dedi ol.
Ministrdiń aitýynsha, qalalyq jolaýshylar tasymalyn damytý jónindegi sharalar kesheni aiasynda 2021 jylǵa áleýmettik mańyzy bar marshrýttardy sýbsidiialaýǵa 58,1 mlrd teńge bólindi.
«Sonymen birge, osy jyldyń mamyr aiynda tuńǵysh ret avtokólik salasyndaǵy áleýmettik áriptestik jónindegi salalyq kelisimge qol qoiyldy. Ol sala jumyskerleriniń áleýmettik-eńbek quqyqtaryn qorǵaý sharalaryn kúsheitýge múmkindik beredi. Avtobýs tasymaly, avtovokzaldar men avtostantsiialarǵa bólshek salyqtyń arnaýly salyq rejimi engizildi. Olar úshin 2023 jylǵy 1 qańtarǵa deiin 3 paiyz mólsherde qosymsha qun salyǵy belgilendi», - dedi Beibit Atamqulov.
