Tsifrlandyrý qarqynyn esh báseńdetpeýimiz kerek. Bul týraly Ulttyq qoǵamdyq senim keńesiniń 6-otyrysynda QR Prezidenti Qasym-Jomart Toqaev aitty, dep habarlaidy "Ult aqparat".
«Tsifrlandyrý – memlekettik saiasattyń uzaq merzimdi basymdyǵy. Men jaqynda arnaiy komissiianyń otyrysyn ótkizdim. Aldymyzda turǵan jańa mindetterdi aiqyndadyq.
Biz tsifrlandyrý qarqynyn esh báseńdetpeýimiz kerek. Bul úrdis barlyq salany qamtýǵa tiis. Birneshe mysal keltireiin. Qazir aqparattyq bazalardyń arasynda bailanys joq. Sonyń saldarynan qaǵaz júzinde qujat talap etý úrdisi áli de saqtalyp otyr. Ulttyq keńestiń múshesi Lázzat Qojahmetova jáne Ýais Ersaiynuly osy máselege toqtaldy.
Máselen, Elektrondy Úkimet bazasyna Eńbek jáne halyqty áleýmettik qorǵaý ministrligi kórsetetin qyzmet túrleri engizilgen. Onda ataýly áleýmettik kómek nemese kóp balaly anaǵa tólenetin járdemaqy alatyn azamattar týraly málimet bar. Soǵan qaramastan jergilikti atqarýshy organdar jáne bilim berý mekemeleri turǵyndardan mór basylǵan qaǵaz anyqtama talap etedi. Biyl Halyqqa qyzmet kórsetý ortalyqtary osyndai eki millionnan astam qujat bergen. Qazirgi tsifrlandyrý dáýirinde munyń esh qajeti joq. Qarapaiym máseleni memlekettik organdar ózderi qiyndatyp otyr.
«Elektrondy úkimettiń» bazasyna ákimdikterdiń, Bilim jáne ǵylym ministrliginiń aqparattyq júielerin qosý kerek. Sonda Halyqqa qyzmet kórsetý ortalyqtarynyń jumysyn jeńildetemiz, azamattardyń ýaqytyn únemdeimiz.
Qujat ainalymyn jáne is júrgizýdi tsifrlandyra bergen jón. Qazir elimizde Eńbek sharttaryn esepke alýdyń biryńǵai júiesi birtindep engizilip jatyr. Bul júie eńbek kitapshalarynan bas tartýǵa jáne qaǵazbastylyqtan qutylýǵa múmkindik beredi. Degenmen, jumys berýshilerdiń kóbi áli kúnge deiin qyzmetkerlerinen eńbek kitapshasyn, jeke paraǵy men jazbasha ómirbaianyn tapsyrýdy talap etedi. Azamattardyń buǵan narazylyq bildirýi oryndy. Mundai eski tásilderden arylý qajet. Osy máseleni Ulttyq keńes músheleri jáne basqa sarapshylar da kóterip júr», - dedi Memleket basshysy.
