Kabýl áýejaiy mańynda beisenbidegi birneshe jarylystan qaza tapqan adam sany júzden asty.
Kabýl aýrýhanalarynan alynǵan sońǵy málimet boiynsha, keminde 90 aýǵan azamaty mert bolyp, 150-ge jýyǵy jaralanǵan. Terakt saldarynan jaralanǵan AQSh-tyń bir áskeri qyzmetishisi kóz jumǵan. Sóitip, Kabýl áiejaiyna kirer joldy kúzetip turǵan amerikalyq áskerilerden qaza tapqandar sany 13 adamǵa jetti. Aýǵanstanda keiingi birneshe jylda AQSh áskerinen bir shabýylda osynsha kóp adamnyń qaza tabýy alǵash ret bolyp otyr.
Beisenbide Kabýl áýejaiyna kireberis pen jaqyn mańdaǵy qonaqúidiń aldynda kóp adamnyń arasyna kirgen jankeshtiler ózin jaryp jibergen. Terrorlyq shabýyl saldarynan 18 amerikalyq sarbaz jaralanǵan, olardyń bári Aýǵanstannan áketildi dep habarlady "Amerika daýysy" radiosy.
Bul shabýyldy "Islam memleketi" ekstremistik uiymy (Qazaqstanda tyiym salynǵan) moinyna aldy. Bul uiym Aýǵanstanǵa qazir biligin ornatqan "Taliban" radikal qozǵalysymen qas, oǵan qarsy birneshe terakti jasaǵan.
AQSh prezidenti Djo Baiden Kabýldegi shabýyldarǵa bailanysty Aq úide sóilegen sózinde qaza tapqan amerikalyq sarbazdardy qaharman dep atap, AQSh terakt jasaǵan qaskóilerdi taýyp alyp, jazasyn beredi dep málimdedi. Onyń sózinshe, Pentagonǵa Kabýlda terakt jasaǵandarǵa soqqy berý josparyn ázirleý tapsyrylǵan.
Baiden Kabýldan evakýtsiialaý operatsiiasy jalǵasatynyn, amerikalyq áskerilerdi Aýǵanstannan 31 tamyzǵa deiin áketý jospary ózgermeitinin aitty. Terrorister AQSh-ty missiiasyn toqtatýǵa májbúr ete almaidy dedi ol.
Kabýl áýejaiyndaǵy amerikalyq áskeriler AQSh jáne ózge elderdiń azamattaryn Aýǵanstannan evakýatsiialaýǵa járdemdesip jatyr. Baidenniń sózinshe, 15 tamyzdan beri 100 myńnan astam dam evakýatsiialanǵan.
Frantsiia prezidenti Emmanýel Makron Kabýldegi teraktini aiyptap, áýejaida evakýatsiia operatsiiasyn iske asyryp jatqandardyń "eren erligin" atap aitty. Frantsiia bul isti aiaǵyna jetkizedi dedi ol.
Ispaniia premer-ministri Pedro Sanches te Kabýl áýejaiy mańynda bolǵan terrorlyq shaýbyldy aiyptap, tipti teraktiden keiin de ispan úkimeti Aýǵanstannan neǵurlym kóp adamdy qaýipsiz jerge shyǵarýǵa tyrysatyn bolady dep málimdedi.
Avstraliia men Norvegiia Aýǵanstannan azamattaryn evakýatsiialaýdy toqtata turýdy uiǵardy.
AQSh kongresi músheleri prezident Baiden men onyń ákimshiligin Kabýl áýejaiy mańynda amerikalyq sarbazdardy mert qylǵan teraktige kinálilerdi taýyp, jaýapqa tartýǵa shaqyrdy. Ókilder palatasyndaǵy respýblikashyldar lideri Kevin Makkarti spikerge Aýǵanstandaǵy jaǵdaidy talqylaý úshin kanikýlda júrgen zań shyǵarýshylardy shuǵyl shaqyryp, tótenshe sessiia ótkizý jaily usynys aitty.
Respýblikashyldar Kabýl áýejaiyndaǵy teraktiler men ózge de birqatar kemshilikterge jol berdi dep Aq úi basshylyǵyn synaidy. "Dushpanymyz áskeri qalai bolsa solai shyǵarýdy ózine utymdy paidalanyp ketti"dep málimdedi Makkarti.
- Tamyzdyń ortasynda "Taliban"radikal qozǵalysy (Qazaqstanda terrorlyq uiym retinde tyiym salynǵan) Aýǵanstanda bilikti basyp aldy. AQSh óz azamattary men odaqtas elderdiń azamattaryn Aýǵanstannan 31 tamyzǵa deiin alyp ketýdi josparlap otyr.
