«Jas Otan» jastar qanatynyń tóraǵasy Elnur Beisenbaev uiymnyń 2025 jylǵa deiingi «Jastar - Otanǵa!» baǵdarlamasyn tanystyrdy, dep habarlaidy QazAqparat.
«Biz partiiamyzdyń tóraǵasy - Elbasy Nursultan Nazarbaevtyń tikelei tapsyrmasymen «Jastar - Otanǵa!» baǵdarlamasynyń jobasyn ázirlegen bolatynbyz. Qazirgi tańda bul joba jastardyń arasynda qyzý talqyǵa túsip jatyr. Baǵdarlama jastardyń barlyq sanatyn qamtidy. Ol bes baǵyttan turady. Birinshisi – azamattyq belsendilik, ekinshisi – sapaly bilim, úshinshisi – jumysqa ornalasý jáne jumyspen qamtý, tórtinshi – jas otbasylardy baspanamen qamtý jáne qoljetimdi baspana, besinshisi – tulǵalyq damý jáne bos ýaqytty tiimdi ótkizý», - dedi baǵdarlamany OKQ alańynda tanystyrǵan Elnur Beisenbaev.
Onyń aitýynsha, baǵdarlama jasalmas buryn «Jas Otan» Jastar qanatynyń músheleri el boiynsha onlain jáne oflain rejimde 200-ge tarta kezdesý ótkizgen.
«Sol kezdesýlerdiń aiasynda jastar tarapynan 4 myńǵa jýyq usynys jinadyq. Jalpy «Jastar - Otanǵa!» baǵdarlamasyn ázirleý barysynda qandai máselelerge den qoidyq. Birinshiden jastar arasynda áleýmettik saýalnama júrgizildi. Ekinshiden Kanada, Germaniia sekildi elderdiń jastar saiasatyn qoldaý boiynsha halyqaralyq tájiribelerin zerttedik. Sondai-aq BUU jastardy qoldaý strategiiasy – osy baǵdarlamanyń negizderiniń biri boldy. Jalpy bul baǵdarlamany daiyndaǵan kezde Memleket basshysynyń Joldaýda jastarǵa qatysty aitqan máselelerin qamtydyq», - deidi ol.
Aita keterligi, «Jas Otan» jastar qanatynyń quramyna 106 myń azamat bar.
