Sýret áleýmettik jelilerden alynǵan
Izrail Syrtqy ister ministrligi HAMAS sodyrlary urlap áketken stýdent, nemis qyzy Shani Lýktyń kóz jumǵanyn rastady, - dep habarlaidy Kazinform agenttigi VSS-ge silteme jasap.
Aita keteiik, buǵan deiin mýzyka festivali kezinde HAMAS músheleri tutqynǵa alǵan boijetkenniń ólimi týraly onyń anasy habarlaǵan bolatyn.
«Germaniia jáne Izraildiń azamaty – 23 jastaǵy Shani Lýktyń denesi tabylyp, jeke basy anyqtalǵanyn qaiǵyra habarlaimyz», – delingen Izrail SIM-niń X áleýmettik jelisindegi resmi akkaýntynda.
Málimetke súiensek, stýdent qyz azaptap óltirilgen.
«HAMAS sodyrlary mýzyka festivalinen kúshtep áketip, azaptap, Gaza sektorynda jurtshylyq aldyna shyǵarǵan Shani aqylǵa qonymsyz qatigezdikti bastan keshti. Shanidiń qaiǵyǵa ushyraǵan dostary men januiasy úshin duǵadamyz», – delingen SIM habarlamasynda.
Shani Lýk 7 qazanda palestinalyq HAMAS toby Izrailge shabýyl jasaǵan kezde Supernova mýzyka festivalinen kúshtep áketilgen. Boijetken iz-túzsiz joǵalǵandar tiziminde boldy. Tutqynǵa alynǵandar arasynda Qytai men Tailand azamattary da bar ekeni aityldy.
21 qyrkúiekte HAMAS AQSh-tyń eki azamaty – 59 jastaǵy Djýdit Raanan men onyń 17 jastaǵy qyzy Natali Raanandy bosatty.
Izrail tarapynyń málimdeýinshe, HAMAS 7 qazanda Izraildiń ońtústigindegi qalalarǵa shabýyl jasaǵannan keiin Gaza sektoryna 203 adamdy alyp ketken.
Gaza densaýlyq saqtaý ministrliginiń málimetinshe, Izrail soqqylarynan qaza bolǵan adamdar sany 8300-den asty, onyń ishinde 3457 bala jáne 2236 áiel bar.
