Italiianyń Lido aralynda 77-shi Venetsiia kinofestivali bastaldy, dep habarlaidy "Ult aqparat" Euronews agenttigine silteme jasap.
Bul - pandemiia bastalǵaly beri osyndai aýqymdaǵy eń alǵashqy shara. Mysaly Kann festivalin uiymdastyrýshylar juldyzdardy shaqyrýǵa qaýiptengen bolatyn. Al bul jaǵdaida festival onlain formatqa aýystyrylǵan joq. Munda tek eksperiment kino baiqaýy ǵana onlain ótedi.
Sharada qaýipsizdik talaptary saqtalǵan. Kórermender qyzyl kilemmen júrip ótken juldyzdardy tamashalai almady, zaldaǵy oryn sany azaiǵan, al maskany barlyǵy taǵýǵa mindetteldi.
«Biz halyqtyń kóńil-kúiin kóterip, olarǵa optimizm syilaǵymyz keldi. Sonymen birge rejisserler, prodiýserler, jalpy kino áleminde júrgen barlyq mamanǵa qoldaý kórsetýdi uiǵardyq. Odan bólek, kinoteatr ieleri bizge qulaq asady dep úmittenemiz, óitkeni bul júieni qaita iske qosý kerek. Jańa karantinge bul sala endi tótep bere almaidy. Biz kópshiliktiń senimin qaitaryp alýǵa tiispiz», - deidi Venetsiia kinofestivaliniń kórkemdik direktory Alberto Barbera.
Kinofestivaldiń ashylýyna bir kún qalǵanda «Molekýla» atty derekti film kórsetildi. Onda iesiz bos qalǵan sý ústindegi qalanyń tirshiligi týraly aitylady. Ol búkil Italiianyń koronavirýs epidemiiasy kezindegi jaǵdaiynan habar beredi.
«Men bizdiń ómirimizdiń nege sonshalyqty shekteýli ekenin zerttep kórgim keldi. Pandemiia osyny baiqap, kádimgidei sezinýimizge sebep boldy. Odan qandai sabaq alýǵa bolady? Bálkim, sonyń bárine únsiz, kúressiz kóndigý kerektigin túsingen shyǵarmyz» deidi rejisser Andrea Segre.
Is-sharanyń resmi baǵdarlamasyna 50 elden 60 kinokartina engizilgen. Sońǵy 10 jylda alǵash ret italiialyq lenta festivaldi ashyp berdi, ol - Daniele Lýkettidiń «Baý» atty kartinasy.
