Italiianyń Premer-Ministri Djýzeppe Konte koronavirýspen kúres maqsatynda Úkimet engizgen qatal karantin sharalaryn shetinen jeńildete túsý jónindegi Jarlyqqa qol qoidy.
Bul týraly ANSA agenttigi habarlady.
4 mamyr kúni elde ónerkásip óndirisi qaita jandanady. Sonymen qatar saiabaqtar, qurylys alańdary men eksportqa taýar shyǵaratyn kásiporyndar jumysyn bastaidy. Alaida jumys berýshiler jumys ornyn muqiiat dezinfektsiialap, jumysshylar ózara qaýipsiz ara qashyqtyqty saqtaýy kerek. Sondai-aq tek maskamen ǵana jáne shaǵyn kólemde týystardyń úiine barýǵa ruqsat etiledi. Úlken otbasylyq jiyndarǵa burynǵysynsha tyiym salynǵan.
Konte sonymen qatar 4 mamyrdan bastap sportshylardyń da jekelegen sport túrleri boiynsha jattyǵýǵa kirise berýge bolatynyn aitty. Degenmen komandalyq sport túrleriniń jattyǵýlaryna 18 mamyrǵa deiin tyiym salynady. Dúkender mýzeilermen jáne kitaphanalarmen birge jumysyn 18 mamyrdan bastaidy.
Aita keteiik, buǵan deiin tek azyq-túlik pen ózge de birinshi kezekte qajetti taýarlardy saýdalaityn dúkender ǵana jumys istep keldi. Barlar, meiramhanalar, shashtaraz ben sulýlyq salondary óz qyzmetin 1 maýsymnan bastai alady.
Qoǵamdyq tamaqtaný oryndary 4 mamyrdan bastap, ónimderin jetkizip bere alady. Premer Konte mektepterdiń biylǵy oqý jylynyń sońyna deiin jabyq bolatynyn aitty.
Italiiada qazir jerleý rásimin jasaýǵa ruqsat etildi. Aita ketetin másele, úkimet shirkeý messasyn uiymdastyrýdy durys emes dep tapty. Óz kezeginde bul jaǵdai Italiia Episkop Konferentsiiasynyń dini ustanym boiynsha adam quqyǵynyń buzylǵany jónine shaǵym túsirýine negiz boldy. Konte sonymen qatar áleýmettik qashyqtyqty ustaný sharasynyń áli birneshe ai boiyna jalǵasatynyn eskertti.
Eske sala ketsek, Italiiada koronavirýstan qaitys bolǵandar sany Eýropadaǵy eń joǵary kórsetkish bolyp otyr. Sońǵy málimetter boiynsha, bul elde 26,6 myń adam kóz jumyp, 197,6 myń adam aýyrǵan. Soǵan qaramastan infektsiianyń taralý qarqyny tómendep keledi. Sonymen qatar kún saiyn qaitys bolyp jatqandar sany da azaiǵan.
