Elimizde qaiyrymdylyq jáne volonterlik uiym kóp, biraq qaiyrymdylyq institýy joq. Bul týraly Ortalyq kommýnikatsiialar qyzmetinde «Qaiyrymdylyq pen eriktilik - ult mádenietiniń bir bóligi» taqyrybynda ótken onlain brifingte aityldy, dep habarlaidy QazAqparat.
«QR Prezidenti Qasym-Jomart Toqaevtyń 2020 jyldy volonterler jyly dep jariialaǵany barshańyzǵa belgili. Qazirgi tańda búkil álem, onyń ishinde bizdiń eldegi kúrdeli kezeńde eriktilerdiń róli burynǵydan da kóp suranysqa ie boldy. Biyl volonterlerdiń jumysy qalai kúsheigenine kýá boldyq. Pandemiia kezinde eriktiler aianbai eńbek etti. Tájiribede kórsetkendei, biz osymen shektelmei, eriktilerde de, qaiyrymdylyq qorlaryn da belsendi damytýǵa úles qosýymyz kerek. Qaiyrymdylyq sharalary damyp ketken elderdiń tájiribesine súiene otyryp jumys isteýimiz kerek», - deidi «Altyn Qyran Foundation» qoǵamdyq qorynyń qamqorshylyq keńesiniń tóraǵasy Islambek Saljanov.
Onyń aitýynsha, «Giving USA 2018» statistikasyna súienetin bolsaq, amerikalyqtar 400 milliard dollardy qaiyrymdylyqqa jumsaǵan. Onyń 71%-yn qarapaiym halyq jinasa, 16%-yn qoǵamdyq qorlar, al 5%-yn korporatsiialar jinaǵan.
«Bul kórsetkish AQSh-ta qaiyrymdylyq isine tutastai el jumyldyrylǵanyn bildiredi. Batysta qaiyrymdylyq jasaý – jaqsy ádet, ári qalypty jaǵdai. Olar mundai nátijege júieli túrde qol jetkizgen. Olar qaiyrymdylyq jasaýdy mektep, ýniversitetten bastap qolǵa alǵan. Qazaqstan da «Giving USA Foundation» siiaqty institýt quryp, osy taqyrypqa qatysty zertteý jumystaryn júrgizip, qoǵamda qaiyrymdylyq jasaý týraly durys túsinik qalyptastyrýy kerek. Elimizde qaiyrymdylyq jáne volonterlik uiym kóp, biraq qaiyrymdylyq institýy joq. Degenmen elimizdiń tarihy men salt-dástúrinde qaiyrymdylyq úlken mańyz berilgen. Qazaq halqynda buryn jetimder úii de, qarttar úii de bolmaǵan. Biz qaiyrymdylyqty júieli túrde damytý úshin ózimizde bolǵan túsinikti qaitaryp, halyqaralyq tájiribeni zertteýimiz kerek», - deidi ol.
Islambek Saljanovtyń qaiyrymdylyq sharalarymen ainalysqanyna 15 jyldan asqan. Ol ár qaiyrymdy istiń qaitarymy bar ekenin aitty.
«Jaqsylyq jasasań – Alladan qaitady. Erte me, kesh pe, bárimiz o dúnielik bolamyz, sol kezde ózimizben birge eshteńe alyp ketpeimiz. Bizdiń jasaǵan qaiyrymdy isterimiz artymyzda qalǵan iz bolady, sol sebepti elimizdegi qaiyrymdylyq sharalary men volonterliktiń damýyna árqaisysymyz úles qosaiyq», - deidi «Altyn Qyran Foundation» qoǵamdyq qorynyń qamqorshylyq keńesiniń tóraǵasy.
