Táýelsizdik kúni merekesi qarsańynda ishki ister organdarynyń 32 qyzmetkeri Prezident Q.Toqaevtyń Jarlyǵymen memlekettik nagradamen, sondai-aq 8 qyzmetker Úkimet basshysynyń marapatymen atap ótildi, dep habarlaidy "Ult aqparat".
Marapattaý rásimi Ishki ister ministrliginde ótti.
Ishki ister ministri Erlan Turǵymbaev áskeri jáne qyzmettik boryshyn úlgili oryndaǵany jáne tártipti qamtamasyz etýde kórsetken erik-jigeri úshin IIM-niń 540 qyzmetkeri men áskeri qyzmetshilerin marapattady.
E.Turǵymbaev saltanatty jiynda Qazaqstannyń Tuńǵysh Prezidenti-Elbasy Nursultan Nazarbaevtyń basshylyǵymen bizdiń elimiz álemdegi turaqty jáne bedeldi memleketke ainalǵany týraly Memleket basshysy Qasym-Jomart Toqaevtyń aitqan sózin eske aldy.
Sonymen birge, ministr eldegi quqyqtyq tártiptiń deńgeii politsiianyń jumys sapasymen tyǵyz bailanysty ekenin, árqaisymyzdyń kúsh-jigerimiz qylmysqa jáne kez kelgen zań buzýshylyqtarǵa batyl qarsy turýǵa baǵyttalýy tiistigin, halyq pen politsiia arasynda berik qarym-qatynas qalyptastyrý, azamattardyń ishki ister organdaryna degen senimin arttyrý mańyzdy mindet bolyp tabylatynyn taǵy bir márte atap ótti.
«Ishki ister organdarynyń jeke quramy aldaǵy ýaqytta da quqyqtyq tártip pen azamattardyń qaýipsizdigin qamtamasyz ete otyryp, ózderiniń qyzmettik mindetterin úlgili jáne qajyrly atqara beredi dep senemin», - atap ótti ol.
Sondai-aq vedomstvo basshysy Táýelsizdik kúni qarsańynda ardagerlerge erekshe alǵys bildirdi.
Is-sharanyń saltanatty bóligi aiaqtalǵan soń qyzmetkerler, ishki ister organdary men Ulttyq ulan ardagerleri, sondai-aq shaqyrylǵan qonaqtar úshin merekelik kontsert boldy.
Qazaqstannyń táýelsizdigi jyldary qyzmettik boryshyn adal oryndaǵany, erligi men batyldyǵy úshin ishki ister organdary men Ulttyq ulannyń 1340 qyzmetshisine memlekettik nagrada berilse, onyń ishinde 131-i qaza tapqannan keiin nagradtaldy.
Sonymen qatar, shara barysynda «Quqyq tártibin qamtamasyz etýge qosqan úlesi úshin» medalimen QR Aqparat jáne qoǵamdyq damý vitse-ministri Nurgúl Maýberlinova, «Qazaqstan» TKRK» AQ tóraǵasy Lázzat Tanysbai, «Habar» agenttigi» AQ tóraǵasy Erlan Bekhojin jáne ózge de BAQ basshylary marapattaldy.
