Prezidenttiń kómekshisi – Qaýipsizdik Keńesiniń hatshysy Áset Isekeshev Shanhai yntymaqtastyq uiymyna múshe memleketterdiń qaýipsizdik keńesteri hatshylarynyń on besinshi kezdesýine qatysty, dep habarlaidy "Ult aqparat" Aqordanyń baspasóz qyzmetine silteme jasap.
Prezidenttiń kómekshisi – Qaýipsizdik Keńesiniń hatshysy Áset Isekeshev beinekonferentsiia formatynda ótken Shanhai yntymaqtastyq uiymyna múshe memleketterdiń qaýipsizdik keńesteri hatshylarynyń on besinshi kezdesýine qatysty.
Qatysýshylar ShYU keńistigindegi qaýipsizdik salasyndaǵy ahýaldy, «úsh qastandyqqa» (terrorizm, ekstremizm, separatizm), esirtkiniń zańsyz ainalymyna, transshekaralyq uiymdasqan qylmysqa qarsy kúrestegi ózara is-qimyldy tereńdetý, sondai-aq halyqaralyq aqparattyq qaýipsizdikti qamtamasyz etý máselelerin talqylady.
Shara barysynda ShYU Bas hatshysy men ShYU ÓTQQ Atqarýshy komiteti direktorynyń turaqty jumys isteitin organdarynyń qyzmeti týraly baiandamalary tyńdaldy.
Áset Isekeshev qatysýshylardy COVID-2019 pandemiiasyna qarsy bizdiń memleket tarapynan atqarylyp jatqan is-qimyldar týraly habardar etti. Sanitarlyq-epidemiologiialyq sipattaǵy qaýipterdiń erekshe ózektiligin atap ótip, seriktesterdi osy salada ózara árekettesýdi is júzinde jandandyrýǵa shaqyrdy.
Qazaqstannyń Qaýipsizdik Keńesiniń hatshysy terroristik, ekstremistik jáne ózge de qylmystyq maqsattarda aqparattyq tehnologiialardy keńinen qoldaný qaýpiniń artqanyna nazar aýdardy. Osy syn-tegeýrinderge qarsy kúres aiasynda Qazaqstan tarapy terrorizm men dini ekstremizm ideologiiasyna qarsy is-qimylǵa járdem kórsetý jónindegi internet-resýrstar ákimshilikterine ShYU-ǵa múshe memleketterdiń birlesken kommiýnikesin (úndeýin) ázirleýdi usyndy.
Áset Isekeshev áriptesterin Qazaqstan Prezidenti Qasym-Jomart Toqaevtyń byltyr Bishkekte ótken ShYU sammitinde usynǵan ShYU aqparattyq qaýipsizdik ortalyǵyn qurý bastamasyn qoldaýǵa shaqyrdy.
Esirtkige qarsy baǵyt boiynsha óńirlik ózara is-qimyldyń, sondai-aq ShYU Hatshylyǵy men OAÓAÚO arasyndaǵy yntymaqtastyq týraly memorandýmǵa qol qoiýdy jyldamdatý mańyzdy ekeni aityldy.
Shara barysynda Qazaqstannyń ShYU keńistiginde qaýipsizdikti qamtamasyz etýdiń barlyq ózekti máseleleri boiynsha yntymaqtastyqty nyǵaitý jáne quzyretti memlekettik organdar jelisi boiynsha ózara is-qimyldy odan ári damytýǵa beiildi ekeni naqtylandy.
