Elorda basshysy Áset Isekeshev Astanadaǵy jańbyr saldarynan kóshelerdi alyp ketetin sýdy shyǵarýmen ainalysatyn arnaiy kásiporyn ashýdy usyndy, dep habarlaidy QazAqparat tilshisi.
Úkimet otyrysynda Baqytjan Saǵyntaevtyń suraǵyna jaýap bergen Áset Isekeshevtiń aitýynsha, Astanadaǵy káriz ben qaladan sý shyǵarý júiesi shaharda úsh jyldyq baǵdarlamaǵa bailanysty daiyndalǵan.
«Ákimdik óte aýqymdy jumystardy atqardy. Ótken jyly Turan men Uly Dala kósheleriniń, 31-shi kósheniń, Kóktal kenti men Myń Jyldyq alleiasynyń tazartý qurylymyn aiaqtadyq. Bir jyldyń ishinde qarqyndy qadammen Turan-Syǵanaq tazartý qurylymdarynyń kúrdeli jóndeýin aiaqtadyq. Álbette, kúrdeli ýchastoktar bar. Ásirese, Aqbulaq, Momyshuly jaqqa Abylai han kóshelerinen, Jastar shaǵynaýdany men Ońtústik-Shyǵystan jáne Qoshqarbaev, Táýelsizdik, Myń Jyldyq pen ózge de jaqtan sý jinalady. Sý aǵyzyp shyǵarýdy eki esege kúsheitý úshin kúrdeli tehnikalyq sheshim tabyldy. 2019 jyly ol júzege asady. Osylaisha, qarjylandyrýdy eskere otyryp, jumys qarqyndy túrde júrgizilýde. Úsh jyldyń ishinde negizgi máseleler sheshimin tabatyn bolady», - dedi ol.
Qala basshysy sonymen birge sońǵy kúnderi tirkelgen jaǵdailar boiynsha sóz qozǵady.
«Qazgidromettiń málimetine sáikes, bir jarym táýliktiń ishinde ailyq normadan bir jarym ese kóp jaýyn jaýǵan. 21 tamyzda kúnimen jańbyr jaýdy. 20 tamyzda 17 saǵat boiy tynymsyz taǵy nóser boldy. Úsh kúrdeli ýchastok boiynsha sý kólký jaǵdaiy tirkeldi. Ol jerlerden normativ boiynsha sý sorylyp, syrtqa shyǵaryldy», - deidi Áset Isekeshev.
Shahar basshysy kommýnaldyq qyzmetter eki táýlik boiy tynymsyz jumys júrgizgenin atap ótti.
«Jaýynǵa arnalǵan káriz júieleri jaqsy jasalǵan Singapýr, Máskeý, Kievte, Germaniianyń, AQSh pen Frantsiianyń qalalarynda da tynymyz jaýyn saldarynan sýdyń kólkip ketý jaǵdaiy bolǵanyn atap ótkim keledi. Ákimdik Úkimetpen birge atalmysh máseleni jiti baqylaýynda ustap otyr. Baqytjan Ábdiruly, qazir tabiǵi monopoliialar týraly zańda jańbyr sýyn shyǵarý qyzmeti rettelmegen. Mine, sondyqtan biz Astanada kásiporyn qurý týraly sheshim qabyldaǵymyz keledi. «Astana Tazalyqtyń» bazasynda káriz júielerin balansta ustaityn kásiporyn quratyn ýaqyt keldi. Osyǵan bailanysty jaýapty ministrlikke tapsyrma berýińizdi, «Astana Tazalyqty» jekeshelendirý baǵdarlamasynan shyǵaryp tastaýyńyzdy suraimyn», - dedi Áset Isekeshev.
Eske sala ketsek, búgingi Úkimet otyrysynda Baqytjan Saǵyntaev sońǵy kúnderi nóser saldaryna bailanysty elordanyń kommýnaldyq qyzmetteriniń jumysyn kúsheitýdi tapsyrǵan bolatyn.
