Elordanyń Almaty aýdany boiynsha №2 sotynda Energetika ministrliginiń basqarma basshysy Nurbek Amangeldiulyna qatysty para alý faktisi boiynsha úkim jariialandy, dep habarlaidy QazAqparat.
Buǵan deiin Nur-Sultan qalasy boiynsha Sybailas jemqorlyqqa qarsy qyzmet Energetika ministrliginiń basqarma basshysy Nurbek Amangeldiulyna qatysty isti sotqa joldaǵan bolatyn. Ol gaz jelisi uiymdarynyń ókilderinen iri kólemde (jalpy somasy 6,3 mln teńge) aqsha aldy degen kúdikke ilindi. Ol 2020 jyldyń 16 qarashasynan bastap qamaýda boldy.
«Sot Nurbek Amangeldiulyn qylmys jasaǵany úshin kináli dep tanýǵa jáne oǵan qaýipsizdigi tómen QAJ mekemesinde jazasyn ótep, memlekettik qyzmette, sýdia, jergilikti ózin-ózi basqarý organdarynda, QR Ulttyq banki men onyń vedomstvolarynda, Qarjy naryǵy men qarjy uiymdaryn retteý, baqylaý jáne qadaǵalaý jónindegi ýákiletti organda, memlekettik uiymdar men kvazimemlekettik sektor sýbektilerinde laýazym atqarý quqyǵynan ómir boiyna aiyra otyryp, 8 jyl bas bostandyǵynan aiyrý túrindegi jaza taǵaiyndaýǵa úkim shyǵardy. Nurbek Amangeldiulyna qamaýǵa alý túrindegi bultartpaý sharasy úkim zańdy kúshine engenshe sol kúii qaldyrylsyn», - dedi sýdia.
Sonymen birge, «SK LTD KZ» JShS basshysy bolǵan B. B. Ýtarovqa da úkim shyǵaryldy.
Qylmystyq kodekske sáikes Ýtarov qylmys jasaǵany úshin (para bergeni úshin) kináli dep tanylyp, oǵan qaýipsizdigi tómen QAJ mekemesine 3 jylǵa deiin bas bostandyǵynan aiyrý jazasy taǵaiyndaldy.
