QR Prezidenti Joldaýyndaǵy qazaqstandyq ǵylymdy damytýǵa qatysty oilar ýaqytyly aitylǵan paiym. Mundai pikirdi L.Gýmilev atyndaǵy EUÝ halyqaralyq qatynastar kafedrasynyń dotsenti, PhD doktory Dalelhan Aibolat bildirdi, dep habarlaidy QazAqparat.
«Memleket basshysynyń óz Joldaýynda qazaqstandyq ǵylymdy damytýǵa qatysty bildirgen oilaryn ýaqytyly aitylǵan paiym dep baǵalaýǵa bolady. Irgeli ǵylymdarǵa beriletin granttardyń merzimin 3 jyldan 5 jylǵa uzartý óte oryndy. Kóptegen ǵylym salalarynda irgeli zertteýler júrgizý - ǵylymi granttarǵa qoiylatyn basty talaptardyń biri. Iaǵni zertteý nátijelerin álemdik bedeldi ǵylymi jýrnaldarda jariialaýǵa 3 jyldyq merzim azdyq etetini ras. Ǵylymi grantty jeńip alǵan kóptegen zertteýshiler ýaqyt tyǵyzdyǵynan óz zertteýlerin sapaly aiaqtap, zertteý barysynda qol jetkizgen zertteý qorytyndylarynyń shynaiylyǵyna tolyqqandy kóz jetkizýge jáne ár ǵylymi maqalany uzaq saraptap, retsenziialaityn halyqaralyq reitingi joǵary jýrnalda óz jumystaryn jariialap úlgermei jatatyndyǵyn alǵa tartady. Sonyń saldarynan kóptegen qazaqstandyq ǵalymdar maqalalaryn asyǵys «alaiaq» jýrnaldarda jariialap, elimizdiń ǵylym deńgeii men bedeline nuqsan keltirip jatatyny jasyryn dúnie emes»,- dedi ǵalym.
Sondai-aq, ol ǵylym granttarynyń bólinýine qatysty qazaqstandyq ǵalymdardyń ýáji de kóp ekendigin alǵa tartady.
«Birneshe jyl buryn baspasóz betteri men áleýmettik jelilerde kóptegen ǵalymdarymyz óz jobalarynyń saraptama kezeńinde joǵary upai jinaǵanyna qaramastan grantqa ie bola almai qalǵanyn aityp, ǵylym granttaryn bólýde «barmaq basty, kóz qystylyq» kóp ekenin alǵa tartqan edi. Memleket basshysynyń Ulttyq ǵylymi keńesterdiń shyǵaratyn sheshimderiniń obektivti bolýy úshin appeliatsiia institýtyn engizýdi usynýy ǵylym granttaryn bólý barysynda týyndaityn daý-damailardy ońtaily sheship, ǵylymǵa bólingen qarjyny naqty laiyqty ǵalymdar men zertteý toptarynyń igerýine septigin tigizedi dep senemin»,- dedi Dalelhan Aibolat.
