Búgin elordadaǵy «Báiterek» monýmentinde Iraktan oralǵan 14 balanyń 10-y týystarymen qaýyshty, dep habarlaidy QazAqparat.
Balalardy týystaryna tabystaý sharasyna QR Syrtqy ister ministriniń orynbasary Erjan Ashyqbaev, Nur-Sultan qalasy ákiminiń orynbasary Baqtiiar Máken, QR Bilim jáne ǵylym ministriniń balalar quqyǵy jónindegi keńesshisi Raisa Sher qatysty.
«Elbasymyzǵa, Qazaqstan Prezidentine, balalarymyzdyń Otanyna oralýy úshin tyńbai eńbek etken barlyq janǵa shynaiy rizashylyǵymdy bildiremin. Búgin mine, úsh nemeremmen qaýyshyp otyrmyn. Olardy eshqaida jibermeimin, qasymda bolady. Eshkimge bermeimin, ózim tárbieleimin. Qýanyshymda shek joq. Úide atasy, aǵa-ápkeleri asyǵa kútip otyr. Eki úlken nemerem Qazaqstanda dúniege kelgen, meni tanidy. Al kishkentai qyz nemerem ana jaqta týǵan», - dedi Oral qalasynan kelgen Yqylas esimdi balanyń ájesi.
Shara aiasynda BAQ ókilderine suhbat bergen QR Syrtqy ister ministriniń orynbasary Erjan Ashyqbaev búgingi protsedýra «Rýsafa» degen ataýmen arnaiy ótizilgen operatsiianyń logikalyq aiaqtalýy sanalatyndyǵyn aitty.
«Bul balalarǵa el bolyp qamqorshy, tilekshi boldyq. Biraq, naǵyz qamqorlyq kóretin jerleri – otbasy. Sondyqtan týystaryna tabystap otyrmyz. Memleket bul balalarǵa barynsha kómek kórsetýge tyrysady», - dedi ol.
Al Raisa Sherdiń aitýynsha, búgin Iraktan oralǵan 14 balanyń 10-y týystarynyń qoldaryna tabystaldy. Qalǵan 4 bala Nur-Sultan qalasynda qalady jáne otbasylyq úlgidegi balalar úiine ornalastyrylady.
«Qazir osy máseleni qarastyryp jatyrmyz. Aldaǵy ýaqytta turatyn oryndary naqtylaný ústinde. Bul tórt bala aǵaiyndy jáne olardyń týystary Qaraǵandy oblysynda turady. Olar balalardan bas tartyp otyr. Sondyqtan olar memlekettiń qamqorlyǵynda bolady», - dedi Raisa Sher.
Aita keteiik, osy jylǵy qarashanyń 27-inen 28-ine qaraǵan kúni Iraktan 14 bala Qazaqstanǵa jetkizildi. Olar Nur-Sultan qalasyndaǵy qiyn jaǵdaiǵa tap bolǵan balalardy qoldaý ortalyǵynda meditsinalyq tekserýden ótip, ortaǵa beiimdelgen bolatyn.
