Interpol úilestirgen halyqaralyq arnaiy operatsiia barysynda adam saýdasymen ainalysqan qylmystyq jelilerge soqqy berilip, álemniń 59 elinde myńnan astam adam ustaldy, dep habarlaidy ult.kz.
«Global Chain» («Jahandyq nysana») kodtyq ataýymen ótken operatsiia 8–12 maýsym aralyǵynda uiymdastyryldy. Oǵan Afrika, Aziia, Eýropa, Soltústik jáne Ońtústik Amerika elderiniń quqyq qorǵaý organdary qatysty. Arnaiy is-shara seksýaldyq qanaý, májbúrli eńbek, adamdardy qylmystyq áreketterge tartý jáne qaiyrshylyqqa májbúrleýmen ainalysqan halyqaralyq qylmystyq toptarǵa qarsy baǵyttaldy.
Operatsiia nátijesinde adam saýdasyna qatysy bar degen kúdikpen 334 adam, al osyǵan bailanysty ózge qylmystar úshin taǵy 690 adam ustaldy. Tekserý sharalary shekara beketterinde, áýejailarda, kólik toraptarynda jáne buǵan deiin kúdikke ilingen nysandarda júrgizildi.
Quqyq qorǵaý organdary adam saýdasynyń 2 070 qurbanyn anyqtap, 465 qylmystyq is boiynsha tergeýdi bastady. Interpol málimetinshe, zardap shekkender álemniń 45 eliniń azamattary. Olardyń arasynda Argentina, Kolýmbiia, Venesýela, Moldova jáne Nepal turǵyndary basym. Kópshiligi jalǵan ýáde, aldaý nemese dármensiz jaǵdaiyn paidalaný arqyly shetelge áketilgen.
Operatsiia barysynda birneshe iri qylmystyq jeliniń joly kesildi. Braziliiada adamdardy Kambodjaǵa aparyp, internet-alaiaqtyqqa májbúrlegen transulttyq top áshkerelendi. Nátijesinde 406 adam qutqarylyp, kúdiktilerge halyqaralyq izdeý jariialandy.
Argentinada májbúrli eńbekke jegilgen Boliviianyń eki kámeletke tolmaǵan azamaty qutqarylsa, Belgiiada áleýmettik jeli arqyly jas qyzdardy aldap, jezókshelikke májbúrlegen qylmystyq toptyń 17 múshesi ustaldy.
Interpol sońǵy jyldary adam saýdasymen ainalysatyn toptardyń jańa tásilderdi jii qoldanatynyn atap ótti. Olardyń qatarynda shetelde joǵary jalaqyly jumys usynamyz degen jalǵan habarlandyrýlar, Eýropadaǵy májbúrli eńbek jáne Ońtústik-Shyǵys Aziiadaǵy internet-alaiaqtyq ortalyqtaryna adamdardy tartý shemalary bar.
Belgili bolǵandai, anyqtalǵan qurbandardyń árbir onynshysy – kámeletke tolmaǵan bala. Olardyń basym bóligi seksýaldyq qanaýǵa ushyraǵan. Qazir barlyq zardap shekkenderge qajetti qorǵaý jáne áleýmettik-psihologiialyq kómek kórsetilip jatyr.
