Infliatsiianyń ósýi syrtqy jáne ishki faktorlarǵa birdei dárejede bailanysty. Bul týraly QR Ulttyq bankiniń tóraǵasy Erbolat Dosaev Qazaqstan qarjygerleriniń IX kongresinde aitty, dep habarlaidy QazAqparat.
«Ulttyq banktiń negizgi mandaty – baǵa turaqtylyǵyn qamtamasyz etý. Pandemiianyń órshý kezeńinde biz ishki suranys tómendegen jaǵdaida ekonomikalyq belsendilikti saqtaý úshin yntalandyrýshy aqsha-kredit saiasatyn júrgizdik, bul karantindi qatańdatý sharalarynyń dezinfliatsiialyq áserin kúsheitti. Ekonomika ósiminiń oń traektoriiasyna shyqqan soń biz proinfliatsiialyq táýekelder kúsheigen jaǵdaida aqsha-kredit saiasatynyń baǵytyn ózgertemiz. Búginde baiqalyp otyrǵan infliatsiianyń ósýi syrtqy jáne ishki faktorlarǵa teń dárejede bailanysty», - dedi Erbolat Dosaev.
Spikerdiń aitýynsha, bir jaǵynan jahandyq naryqtardaǵy suranys pen usynys alshaqtyǵynyń kúsheiýi jetkizýdegi irkilisterge, tasymaldaý qunynyń, shikizat pen azyq-túlik taýarlary baǵasynyń ósýine alyp keledi.
«Sońǵy 10 jylda álemde azyq-túlik baǵasynyń eń joǵary ósimi tirkeldi, metaldar bir jylda 1,5 esege qymbattady. Shikizatqa suranysty kórsetetin qurǵaq júkterdi tasymaldaý quny tapsyrystardyń ósýi men konteinerlerdiń jetispeýine bailanysty 2019 jyldyń aiaǵynan bastap 3,2 esege jáne 2020 jylǵy mamyrmen salystyrǵanda 7 esege ósti. Nátijesinde eń joǵary kórsetkishter jańarǵanda syrtqy infliatsiialyq fon da nasharlaidy. AQSh-ta infliatsiia 1990 jyldan bastap 30 jyldyq maksimýmǵa jetip, 6,2% boldy, Eýropa odaǵynda da ol rekordtyq kórsetkish – 4,1%-ǵa jetti», - dep atap ótti Ulttyq bank basshysy.
Erbolat Dosaev málimdegendei, mundai jaǵdaida ortalyq bankter aqsha-nesie sharttaryn qatańdatýǵa kóshe bastaidy. Biylǵy qyrkúiek aiynyń basynan bastap 24 eldiń ortalyq bankteri negizgi mólsherlemelerin kótergen.
