QR Indýstriia jáne infraqurylymdyq damý ministri Beibit Atamqulov avtokólikke arnalǵan ýtil alym boiynsha ádistemeni qaita qaraýǵa qatysty pikir bildirdi, dep habarlaidy QazAqparat.
Ýtil alymnyń normalary 2015 jyly qabyldanǵanyna toqtalǵan ministr, sodan beri onyń erejeleri qarastyrylmaǵanyn aitty. Qazirgi kezde bul másele óte ózekti bolyp tur jáne áleýmettik jelilerde de kóterilip jatyr.
«Bul másele belsendi túrde kóterilip jatyr. 2015 jyly qamtylǵan esepteý ádistemesin qaraý kerek. Osy ýaqyt ishinde valiýta baǵamynyń aiyrmashylyǵy da, devalvatsiialyq protsester de boldy. Búginde ýtil alymynyń parametrleri áli de ózgermedi», - dedi Atamqulov Parlament Májilisinde tilshilerdiń saýalyna jaýap bere otyryp.
Onyń paiymynsha, ýtil alymy óz naryǵymyzdy qorǵaý men mashina jasaýdy damytý úshin kerek.
«Qazirgi kezde túrli pikirler aitylyp jatyr. Ýaqyt óte kele, munai men shikizat kólemi sarqylatyny túsinikti. Shikizatty satyp, jańa jumys oryndary men joǵary tehnologiialyq oryndardy qurmastan, import ónimderdi ala berip júre almaimyz. Osy oraida qaita óńdeýge mán berýimiz kerek. Munyń barlyǵy alǵashqy qadamnan bastalady», - dedi Atamqulov.
