Búgin Úkimet otyrysynda QR Indýstriia jáne infraqurylymdyq damý ministri Beibit Atamqulov qurylys salasynda kelesi jyly ashylatyn jańa óndirister týraly aitty, dep habarlaidy QazAqparat.
2022 jyly birqatar jańa óndiris ashylady. Olardyń ishinde mynalardy atap ótýge bolady:
- «Orient Ceramic» jaýapkershiligi shekteýli seriktestiginiń iri kólemdi keramika plitkalardy óndirý zaýyty. Qýattylyǵy 3 mln sharshy metr (investitsiia kólemi - 7 mlrd teńge, 250 jumys orny);
- «Bolashak Electric» jaýapkershiligi shekteýli seriktestiginiń jabyq vakýýmdy ajyratqyshtar men mikro-protsessorlyq júielerdi óndirý zaýyty (investitsiia kólemi – 3 mlrd teńge, 100 jumys orny);
- «Valtherm» jaýapkershiligi shekteýli seriktestiginiń radiatorlar óndirý zaýyty (investitsiia kólemi – 3,6 mlrd. teńge, 100 jumys orny);
- «SG Brick» jaýapkershiligi shekteýli seriktestiginiń elimizdegi eń iri kirpish zaýyty. Qýattylyǵy jylyna 100 mln kirpish (investitsiialar kólemi –11,2 mlrd teńge, 50 jumys orny).
«Ishki naryqty otandyq óndiristiń neǵurlym suranysqa ie qurylys taýarlarymen (sanfaians, laminattalǵan jabyn, shyny maqta, qysh taqtaisha, bólmearalyq esik, jylý oqshaýlaǵysh materialdar) qamtamasyz etý jumystary jalǵasady. «Samruk-Kazyna Construction» aktsionerlik qoǵamymen birlesip jalpy somasy 601,3 mlrd teńgege 35 importty almastyratyn jobany iske asyryp, 8 616 jańa jumys ornyn ashý josparlanýda», - dedi B. Atamqulov.
Onyń aitýynsha, sanfaians, keramika plitka, mineraldyq jylytqysh, aǵash-jońqa taqtasy siiaqty otandyq qurylys taýarlarymen qamtamasyz etý boiynsha jańa óndiristerdi ashý kózdelip otyr.
«Bul jobalardy iske qosý ishki naryqtaǵy import úlesin shamamen 60 paiyzǵa tómendetedi jáne qurylys materialdary baǵasynyń aýytqýyn boldyrmaidy. Jańa jobalardy iske qosý 2025 jylǵa qarai ónimniń 10-nan astam túri boiynsha ortasha jyldyq qajettilikti 700 mln AQSh dollary kóleminde óteýge múmkindik beredi. Taýar pozitsiialary boiynsha – temir beton buiymdary, beton, qurǵaq qospa, lak boiaý, kirpish, shyny, kabel, aǵash-jońqa taqtalary jáne qasbettik taqtalar boiynsha ishki naryq suranysyn 100% jabý josparlanýda», - dedi vedomstvo basshysy.
Sonymen qatar, ishki naryqtyń 50% astamy importqa táýeldi qurylys materialdary - aliýminii radiator, polietilen qubyr, shatyr materialdary, radiator, metall jabyndar, esik bloktary, keramika plitka, sanfaians jáne armatýra boiynsha suranysty jabý josparlanyp otyr.
