Ilia Ilinniń 2020 jyly ótetin Jazǵy Olimpiada oiyndaryna barýy-barmaýy ázirge belgisiz. Bul týraly Ortalyq kommýnikatsiialar qyzmetinde baspasóz máslihatyn ótkizgen sportshynyń ózi málim etti, dep habarlaidy Ult.kz tilshisi QazAqparat agenttigine silteme jasap.
«Bir jyl buryn úlken sportta maǵan qatysty másele týyndaǵan edi. Ýaqyt ótti. Bári aiaqtalǵan soń sportqa oralýǵa ýáde bergen edim. Sol úshin esep berip otyrmyn. Ekinshiden, eń aldymen qoldaý bildirgen halyqqa alǵys bildirgim keledi. Jaǵdaiǵa qaramastan, áli de halyqtyń arqasynda qiyndyqtardy eńserip kelemin. Kóshede kórgenderdiń biraýyzdan «myqty bol» degeni meni rýhtandyrady», - deidi Ilia Ilin.
Ilia Ilin QR Aýyr atletika federatsiiasy tarapynan barlyq áreket jasalǵanyn atap ótti. Sonymen qatar ol Tokio Olimpiadasyna qatysý týraly suraqqa jaýap berdi.
«Men qazir eshteńe aita almaimyn. Sebebi, eki kún ǵana ótti. Birinshiden, men áli 29 jastamyn. Iri jarysqa qatysýǵa barlyq jaǵdaiym bar. Shamam barda ketý durys bolmas edi. Pomostta áli de kúsh-qýatymdy kórsetkim keledi. Bizdiń sporttyq basqarmamen sóilesý kerek. Álbette, meniń aǵzamnyń saýlyǵyn, iri jarysqa sai keletinin tolyq tekserýimiz kerek. Osyǵan deiin árine, sporttan qol úzgen joqpyn. Biraq 1,5 jyl boiy denege salmaq túsirmedim. Iaǵni, sporttyq jaǵdaida bolmadym. Sondyqtan, dárigerler «aǵzań sai keledi, júrek shydaidy» dese, 95 paiyzǵa Olimpiada barý týraly sheshim qabyldaimyn», - deidi sportshy.
Eske sala ketsek, Halyqaralyq olimpiada komiteti qazaqstandyq aýyr atlet Ilia Ilinniń Beijińdegi jáne Londondaǵy altyn medaldaryn aiyrý týraly sheshim shyǵarǵan bolatyn. HOK-tyń tártip komissiiasynyń sheshimine sáikes «A» jáne «V» doping synamasynyń qorytyndysy boiynsha eki jazǵy Olimpiada oiyndarynda chempion atanǵan qazaqstandyq sportshy Ilia Ilinniń buǵan deiingi kórsetkishteri joiylǵan edi.
