Qazaqstandyq sportshy Ilia Ilin Astanada jýrnalistermen kezdesti, dep habarlaidy "Ult aqparat".
BAQ ókilderi doping daýynan keiin eki jyl sporttan shettetilýge májbúr bolǵan atletten qiyn sátte odan kimder teris ainalǵanyn surady.
"Menen eshkim teris ainalǵan joq. Barlyǵy jaqsy boldy. Ómirde keibir adamdarmen jolyń aiyrylatyn sátter bolady. Onyń ómiri basqa, seniń ómiriń basqa arnaǵa túsedi. Biraq menen eshkim teris ainalyp ketken joq. Sol úshin de men baqytty janmyn. Ata-anam, jaqyndarym – bári qiyn sátte janymnan tabyldy. Álsizdigińdi bóten bireýge kórsete almaisyń ǵoi, tek úide ǵana. Qiyn sátterde shydamdylyq tanytyp, maǵan demeý bolǵan áke-shesheme alǵys aitamyn", — dedi Ilin.
Ilin sondai-aq burynǵy bapkeri - Erjas Boltaevpen qarym-qatynasy týraly aitty.
«Erjas jaily aitarym - burynǵydai qarym-qatynasymyz jaqsy. Ol Qazaqstan quramasyna jumys isteýge ketti. Qazir jigitterdi baptap jatyr. Keremet jattyqtyrýshy. Men árdaiym ol jaily aityp kelemin, Qazaqstan quramasyn alǵa jetelep júre alatyn adam. Ol jaqta Sergei Sedov, Arman Ábdireev te bar. Quramanyń osy tirekteri atletterdi shynaiy daiyndai alady. Olar ony dáleldep keledi», - dedi aýyr atlet.
«Sońǵy márte serpilis jasaý kerek!» degen aýyr atlet sporttyq mansabyn Tokioda aiaqtaý týraly ideia burynnan baryn jetkizdi.
Eske sala ketsek, Ilia Ilinniń synamasynan doping tabylyp, 2008 jáne 2012 jyldary ótken Olimpiada oiyndarynyń altyn júldelerinen aiyrylǵan edi. Aýyr atletti sporttan shettetý merzimi osy jyldyń 10 maýsymynda aiaqtaldy.
