«Jer qoinaýy jáne jer qoinaýyn paidalaný týraly» kodekstiń pármenimen elimizde munai óndirý kezinde ilespe gazdy aýada jaǵý mólsheri keiingi 15 jylda 8 ese azaidy. Úkimet otyrysynda QR Energetika ministri Maǵzum Myrzaǵaliev osyndai málimet usyndy, dep habarlaidy QazAqparat.
«Memleket basshysy 2060 jylǵa qarai kómirtegi beitaraptyǵyna qol jetkizý jáne Parij kelisimi sheńberinde alynǵan mindettemelerdiń oryndalýyn qamtamasyz etý mindetin qoidy.
Bul mindettemeler 2030 jylǵa qarai parniktik gazdar shyǵaryndylaryn 1990 jylǵy deńgeiden 15 paiyz qysqartýdy talap etedi.
Budan basqa, Prezident óz Joldaýynda 10 lastanǵan qalany gazdandyrý jáne balamaly energiia kózderine kóshirýdi tapsyrǵan bolatyn»,- dedi vedomstvo basshysy.
Onyń aitýyna qaraǵanda, ministrlik osy tapsyrmalardy oryndaý úshin alaýlarda gazdy jaǵýǵa tyiym salý, jumys istep turǵan jylý elektr ortalyqtaryn gazǵa kóshirý, kómir stantsiialarynda eń ozyq qoljetimdi tehnologiialardy engizý, jańartylatyn energiia kózderin damytý siiaqty keshendi sharalar qabyldap jatyr.
«Ekologiialyq jaǵdaidy jaqsartý úshin Energetika ministrligi zańnama bazasyn jetildirý boiynsha aýqymdy jumys atqardy. «Jer qoinaýy jáne jer qoinaýyn paidalaný týraly» kodekstiń babymen ilespe jáne tabiǵi gazdardy alaýlarda jaǵýǵa tyiym salynyp otyr.
Sondai-aq, jer qoinaýyn paidalanýshylardyń shiki gazdy óńdeýdi damytý baǵdarlamalaryn ázirleý jónindegi mindeti zańnamalyq túrde belgilengen.
Sonyń nátijesinde alaýlarda jaǵylatyn gaz kólemi 2006 jylmen salystyrǵanda 8 ese azaidy. 2006 jyly bul kórsetkish 3,1 mlrd tekshe metr bolsa, 2020 jyly 390 mln tekshe metr boldy», - dedi Maǵzum Myrzaǵaliev.
