Almaty oblysy aýmaǵyndaǵy Ile-Balqash memlekettik tabiǵi rezervatynda júrgen buǵylardyń moinyna GPRS baýlar taǵyldy. Bul baýlar buǵylardyń qozǵalysyn baqylyp, olardyń jaǵdaiyn bilýge múmkindik beredi, dep habarlaidy QazAqparat tilshisi.
Ile-Balqash memlekettik tabiǵi rezervaty ótken jyldyń maýsym aiynda ashylǵan bolatyn. Mundaǵy maqsat dál osy aýmaqta kezinde meken etip, joiylyp ketken jolbarystardyń popýliatsiiasyn jandandyrý. 400 myń gektardan astam jer erekshe qorǵalatyn aýmaqqa ainalyp, jolbarystardy 2025 jyly jiberý josparlanyp otyr. Al oǵan deiin jyrtqyshtyń azyqtyq qoryn qamtamasyz etý kerek. Sondyqtan túrli shópqorekti janýarlardyń sanyn kóbeitý jumystary bastalyp ketti. Alǵashqy bolyp munda byltyr Toǵai buǵylary ákelindi. Qazir olardyń urǵashylaryna arnaiy baýlar taǵylyp, qozǵalysy baqylaýǵa alyndy.
«GPRS baýlar «WWF» - Búkilálemdik jabaiy tabiǵat qorynyń Qazaqstanǵa jolbarysty qaitarý baǵdarlamasy aiasynda alyndy. Moiyn baýlardan kelip túsken málimetterdi rezervattyń ǵylymi bólimi saraptaityn bolady. Máselen, buǵylardyń rezervat aýmaǵyndaǵy qozǵalysy, belgili bir mekende qansha ýaqyt aialdaýy baqylanady, tipti maral ólip qalǵan jaǵdaida da aqparat alýǵa bolady», - deidi rezervattyń bólim basshysy Lina Valdshmit.
Sondai-aq, onyń aitýynsha, bul baýlardyń qýaty 2 jylǵa jetedi.
«Olardy qaýipsizdik maqsatynda tek urǵashy janýarlarǵa taǵýǵa bolady. Jas tóldiń ósetinin eskersek, baý olardy tunshyqtyrýy múmkin. Al erkek buǵylar óte belsenbi bolǵandyqtan, múiizimen ilip ketip, ózin jaraqattap, qondyrǵyny buzyp tastaýy múmkin», - dep oiyn tolyqtyrdy Lina Valdshmit.
