Ile-Alataý ulttyq parkinen jer ýchaskelerin qysqa jáne uzaqmerzimdi paidalanýǵa berýge arnalǵan konkýrs pen tender ótpeitin boldy, dep habarlaidy "Ult aqparat" Orman sharýashylyǵy jáne janýarlar dúniesi komitetine silteme jasap.
Ile-Alataý memlekettik ulttyq tabiǵi parkinen jer ýchaskelerin týristik jáne rekreatsiialyq qyzmetti júzege asyrýǵa 25 jylǵa deiin uzaqmerzimdi jáne 5 jylǵa deiin qysqamerzimdi paidalanýǵa berýge baǵyttalǵan konkýrs pen tender ótkizilmeidi.
Komitettiń málimetinshe, buǵan josparlanǵan tender men konkýrstyń ótetin ýaqytyna qatysty jiberilgen tehnikalyq qatelik sebep bolǵan.
Eske salaiyq, 2021 jyly aqpan aiynda Ile-Alataý ulttyq parkinde Ekologiialyq týrizm infraqurylymyn damytýdyń bas jospary boiynsha qoǵamdyq tyńdaý ótken.
«Qoǵamdyq tyńdaý hattamasy Ile-Alataý ulttyq parki men Almaty qalasy jáne Almaty oblysy týrizm basqarmalarynyń saitynda jariialandy. Ulttyq parkterde týristik jáne rekreatsiialyq qyzmetti júzege asyrý erejesine sáikes tender jáne konkýrs qujattarynyń jobasy da ulttyq parktiń internet resýrsyna salyndy.
Jaqyn arada «Ile-Alataý» MUTP tender men konkýrs boiynsha talqylaý jáne túsindirý jumysyn júrgizedi. Qabyldanatyn sheshimderdiń ashyqtyǵyn qamtamasyz etý úshin ulttyq parktiń Qoǵamdyq keńesteriniń otyrysy da ótkiziledi», delingen habarlamada.
