Politsiianyń servistik modeline kóshý sheńberinde IIM Ákimshilik politsiia komiteti ministr Erlan Turǵymbaevtyń tapsyrmasy boiynsha úkimettik emes uiymdarmen birlesip jergilikti politsiia qyzmetiniń jumysyn taldap, áleýmettik zertteýler júrgizedi. Bul týraly atalmysh vedomostvonyń baspasóz qyzmeti habarlady.
Osy maqsatta Nur-Sultan qalasynda eki myńnan astam adamnan saýalnama alyndy. Respondentter qaýipsizdik pen quqyqtyq tártipti qorǵaý salasyndaǵy qandai problemalardyń kóp mazalaitynyn atap ótti.
Anyqtalǵandai, elorda turǵyndaryn alańdatatyn máseleler tómendegidei:
kei jerlerde kóshe jaryǵynyń bolmaýy;
jol qaýipsizdigi, ásirese mektepter men balabaqshalarǵa jaqyn jerlerdegi qaýipsizdik;
úilerdiń kireberisindegi alkogol men esirtki;
balalar alańdarynyń qaýipsizdigi;
kóshedegi itter jáne janýarlardy qorǵaý;
tynyshtyqty buzý;
kóp qabatty úilerde ornalasqan jeke biznes nysandaryndaǵy órtke qarsy qaýipsizdik.
Júrgizilgen áleýmettik saýalnama elorda turǵyndaryn tolǵandyratyn máselelerdi anyqtap qana qoimai, halyq pen politsiia arasyndaǵy bailanys árbir eldi mekendegi qaýipsizdik deńgeiin arttyrý úshin mańyzdy ekenin kórsetti.
– Tiimdi seriktestik qurý – bul qazaqstandyq politsiianyń servistik modeldiń basty negizi. Áleýmettik saýalnamalar qoǵamnyń qaýipsizdik qajettilikteriniń qurylymyn zertteýge múmkindik beredi. Jergilikti politsiia qyzmetteri naqty aldyn alý sharalaryn ázirleýi úshin osyndai zertteýler ár óńirde júrgiziletin bolady, – dep atap ótti ministr.
Áleýmettik zertteýlerdi daiyndaýǵa jáne óńdeýge «Quqyqtyq saiasatty zertteý ortalyǵy» qoǵamdyq uiymy qatysty. QAZGZÝ ýniversiteti, TheGuests jobalaý-konsaltingtik kompaniiasy jáne Qazaqstan baspasóz klýby saraptamalyq-taldaý jáne konsýltativtik kómek kórsetti.
– IIM seriktester sheńberin keńeitýdi jalǵastyrýda jáne basqa da saraptamalyq uiymdardy, barlyq azamattardy qoǵamdyq qaýipsizdik salasyndaǵy problemalardy birlesip sheshý úshin óz ideialarymen bólisýge shaqyrady, – dep atap ótti Ishki ister ministri.
Zertteý qorytyndysy boiynsha IIM Ákimshilik politsiia komiteti jergilikti politsiia qyzmeti jumysynyń tiimdiligin arttyrý maqsatynda praktikalyq usynymdar, ýchaskelik jáne patrýldik politseilerdiń basqarý júiesinde jáne jumysynda jańa tásilder men ádister ázirleitin bolady.
