Ishki ister ministrligi azamattardy Telegram messendjeri arqyly júzege asyrylyp jatqan alaiaqtyqtyń jańa túrinen saq bolýǵa shaqyrdy, dep habarlaidy ult.kz.
Polisia.kz málimetinshe, qaskóiler memlekettik organdardyń, kompaniialar men uiymdardyń basshylarynyń atyn jamylyp, qyzmetkerlerge habarlama jiberedi. Ol úshin olar naqty basshylardyń fotosýretteri men jeke derekterin paidalanyp, jalǵan akkaýnttar ashady.
Alaiaqtar direktordyń nemese basqa da laýazymdy tulǵanyń atynan uiym qyzmetkerlerinen kórsetilgen esepshotqa shuǵyl túrde aqsha aýdarýdy, belgili bir qyzmettiń aqysyn tóleýdi nemese ózge de qarjylyq operatsiialardy oryndaýdy talap etedi.
Mundai habarlamalar kóbine býhgalterlerge, qarjy bóliminiń mamandaryna jáne uiym qarajatyna qol jetkize alatyn qyzmetkerlerge jiberiledi.
Osyǵan bailanysty IIM azamattarǵa mynadai saqtyq sharalaryn ustanýǵa keńes beredi:
kúmándi habarlama alǵan jaǵdaida eshqandai aqsha aýdarmańyz jáne qarjylyq operatsiia jasamańyz;
mindetti túrde basshymen telefon arqyly nemese jeke sóilesip, tapsyrmanyń ras-ótirigin naqtylańyz;
jiberýshiniń akkaýntyn, telefon nómirin jáne habarlama mazmunyn muqiiat tekserińiz;
kúmán týyndasa, hat almasýdy toqtatyp, bul týraly uiym basshylyǵyna jáne jaýapty qyzmetkerlerge dereý habarlańyz.
IIM ókilderiniń aitýynsha, qarapaiym saqtyq pen qyraǵylyq azamattardyń qarjysyn qorǵap, alaiaqtardyń arbaýyna túsýdiń aldyn alýǵa múmkindik beredi.
