Almatyda QR Prezidenti janyndaǵy Adam quqyqtary jónindegi komissiianyń tóraǵasy, Eýropa keńesiniń Venetsiialyq komissiiasynyń múshesi Igor Rogov BUU-nyń Ortalyq Aziia boiynsha bosqyndar isteri jónindegi Joǵarǵy komissar basqarmasy ókildiginiń basshysy Hans Fridrih Shoddermen kezdesti, dep habarlaidy QazAqparat.
Bul týraly QR Prezidenti janyndaǵy Adam quqyqtary jónindegi komissiianyń baspasóz qyzmeti málim etti.
Áńgimelesý barysynda taraptar azamattyǵy joq tulǵalardyń máselesin túbegeili sheshý, bosqyndar men ishki qonys aýdarýshylardy, Qazaqstannyń azamattyǵy joq adamdardy qorǵaý jáne gýmanitarlyq kómek kórsetý joldaryn talqylady.
Hans Fridrih Shodder ózi ókildigin basqaratyn bosqyndar isteri jónindegi joǵarǵy komissar basqarmasy qyzmetiniń baǵyttary týraly málimet berip, Qazaqstannyń BUU Adam quqyqtary jónindegi keńesine (AQK) 2022-2024 jyldarǵa músheligimen quttyqtady. Sondai-aq 2014 jyly bastalǵan #IBelong naýqany sheńberinde QR Úkimetiniń BJKB-men azamattyǵy joq adamdar máselesinisiń aldyn alý jáne sheshý isindegi ózara is-qimylyn joǵary baǵalady.
Diplomat azamattyǵy joq tulǵa retinde ómir súrý tendentsiiasyn qubylys retinde azaitý baǵytyndaǵy Qazaqstan Respýblikasy zańnamasyna jasalǵan taldaýǵa toqtaldy. Sondai-aq, Qazaqstannyń 1961 jylǵy azamattyǵy joq adamdardyń qataryn qysqartý týraly konventsiianyń, 1954 jylǵy apatridter mártebesi týraly konventsiiany ratifikatsiialaý múmkindigi týraly surady.
Igor Rogov Qazaqstan men Ortalyq Aziiadaǵy BIJJKB-nyń belsendi yntymaqtastyǵy men jemisti qyzmeti úshin alǵysyn bildirip, atalǵan konventsiialardy ratifikatsiialaý máselesin qazirgi ýaqytta quzyretti memlekettik organdar zerttep jatqanyn habarlady.
Qazaqstannyń BUU-ǵa kirýiniń 30 jyldyǵyna jáne Respýblikanyń Eýropa Keńesiniń Venetsiialyq komissiiasyna músheliginiń 10 jyldyǵyna orai biyl birlesken is-sharalar ótkizý múmkindigi de talqylandy.
Sondai-aq, 2012 jyly komissiia «Qazaqstan Respýblikasyndaǵy oralmandardyń, azamattyǵy joq adamdardyń jáne bosqyndardyń quqyqtaryna qatysty jaǵdai týraly arnaiy baiandamany sátti tanystyrǵanyn atap, osy problema boiynsha jańa qujat daiyndaýǵa niet bildirdi. Kezdesý sońynda taraptar yntymaqtastyqty odan ári keńeitý, jumys bailanystaryn ornatý jáne adam quqyqtary salasynda tájiribe almasý kelisimge keldi.
