Jambyl oblysynyń Baizaq aýdanynda myń tonna piiaz dalada shashylyp jatyr. Úsik shalǵan kókónis shirip ketken. Turǵyndar ony jinap áketýdi talap etýde, dep habarlady Sputnik agenttigi KTK arnasyna silteme jasap.
Dál kúre joldyń boiyndaǵy alqapta piiaz qap-qabymen shashylyp jatyr.
Belgili bolǵany, qojalyq iesi eki ai buryn koronavirýstan kóz jumǵan. Sodan beri marqumnyń týystary da tóbe kórsetpegen. Diqan eńbeginiń qyzyǵyn aýyl halqy kórip, shama kelgenshe jaramdysyn jinap alǵan.
Jergilikti turǵyndar qalǵan ónimdi tazartyp tastaý kerek deidi. Áitpese kún jylynsa shashylǵan piiaz iistenip, aýany lastaýy múmkin dep qaýiptenedi.
"Sasyp jatyr, tabiǵatty qurtady ǵoi, ony alý kerek, tazalaý kerek. Adam jaldaý kerek shyǵar. Qazir endi kúni jyly, aldaǵy ýaqytta ne bolatyn bilmeimiz", - dedi aýdan turǵyny Ǵaliia Álihanova.
Shendilerdiń sózinshe, piiaz 300 emes, bar bolǵany 40 gektarǵa egilgen. Iesi alqaptaǵy kókónistiń tórtten bir bóligin jinap úlgermegen. Sóitip 10 gektardan shyqqan myń tonna piiaz aiazda úsip ketken.
"Bári aiaqastynan bolyp ketti. Birinshiden, ol kisiniń basqaryp jatqan qyzmetkerleri jinaýǵa tiis edi. Saqtaý qoimasyna tasymaldap jatqan. Eki ortada jańaǵydai oryn alǵan soń, tasymaldap úlgere almai, ýaqyt sozylyp ketti", - deidi Baizaq aýdany aýyl sharýashylyǵy bóliminiń basshysy Nursultan Aqjolov.
Sheneýnikterdiń aitýynsha, úsik shalǵan piiazdy qoimaǵa kirgizý de qaýipti. Óitkeni buzylǵan kókónis basqa ónimderdi shiritedi. Qoqysqa ainalǵan gollandiialyq piiazdyń alqapta qansha jatary belgisiz. Óitkeni ákimdik ony jinap alýǵa niet tanytpady.
