Nursultan Nazarbaev halyqaralyq áýejaiyna jańa úsh áripti kod berildi, dep habarlaidy QR IIDM Azamattyq aviatsiia komitetiniń baspasóz qyzmeti.
Vedomstvo taratqan málimetke sai, 2014 jyldan bastap Qazaqstan Halyqaralyq áýe kóligi qaýymdastyǵy (IATA) taǵaiyndaǵan Nur-Sultan áýejaiynyń úsh áriptik kodyn ózgertý boiynsha jumys júrgizilgen.
Búkil álem boiynsha áýejailarǵa bir ret jáne turaqty negizde kod berý jónindegi IATA qaǵidalaryna qaramastan, qazaqstandyq tarap óz maqsatyna qol jetkizdi.
«IATA ókilderimen birlesip áýejailardyń kodtaryn taǵaiyndaý jáne ózgertý boiynsha IATA tásilderine ózgeris engizý týraly sheshim qabyldandy. Bul ózgerister 2019 jyldyń 14 qazanynda Varshava qalasynda (Polsha) IATA-nyń barlyq músheleriniń qatysýymen Jolaýshylar tasymaly standarttary (Passenger Standards Meeting) kezdesýinde qoldaý tapty» dep habarlady vedomstvo.
Osy kelisimge sai, 2020 jyldyń 8 maýsymynan bastap Nursultan Nazarbaev Halyqaralyq áýejaiyna NQZ jańa kody berildi, ol barlyq brondaý júielerinde, otyrǵyzý talondarynda, bagaj birkalarynda jáne aqparattyq tabloda kórsetiletin bolady.
