Qysqy konkýrs qorytyndysy boiynsha magistratýraǵa bilim granttary iegerleriniń tizimi jariialandy. Memlekettik granttardy 945 qazaqstandyq jeńip aldy, dep habarlaidy QazAqparat QR Bilim jáne ǵylym ministrligine silteme jasap.
Onyń ishinde ǵylymi-pedagogikalyq magistratýraǵa 837 adam, beiindik magistratýraǵa 108 adam oqýǵa tústi. Úmitkerlerdiń arasynda «Injenerlik, óńdeý jáne qurylys salalary», «Jaratylystaný ǵylymdary, matematika jáne statistika», «Áleýmettik ǵylymdar, jýrnalistika jáne aqparat» syndy baǵyttar suranysqa ie boldy.
Aita keteiik, biyl Bilim jáne ǵylym ministri Ashat Aimaǵambetovtiń tapsyrmasy boiynsha ministrlik magistratýra men doktorantýraǵa granttar berý úshin konkýrsty eki ret dástúrli túrde jazda jáne alǵash ret qosymsha qysta uiymdastyrdy. Osylaisha, túrli sebepterge bailanysty magistratýraǵa túse almaǵan úmitkerler bilim berý granttaryn taǵaiyndaý konkýrsyna qatysýǵa ekinshi múmkindik aldy.
«Memlekettik granttar respýblikalyq konkýrstyq komissiia otyrysynyń qorytyndysy boiynsha berildi. Onyń quramyna memlekettik organdardyń, úkimettik emes uiymdardyń ókilderi, jýrnalister, Qazaqstan stýdentter aliansy men «Otandastar» qorynyń ókilderi kirdi. Otyrysta komissiia barlyq qatysýshynyń nátijesin qarady. Konkýrstyq irikteý rásimi tolyǵymen avtomattandyrylǵan. Magistratýrada oqý úshin bilim granttary úmitkerlerdiń balyna sáikes konkýrstyq negizde berildi», – dep atap ótti QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Memlekettik magistratýra bilim granttary iegerleriniń tizimi ministrliktiń Telegram paraqshasynda jáne Ulttyq testileý ortalyǵynyń saitynda jariialanǵan.
Barlyq grant iegerleri 10 qańtarǵa deiin qujattaryn ýniversitetterdiń virtýaldy qabyldaý komissiialary arqyly tapsyrady. Oqý joǵary oqý oryndarynyń akademiialyq kúntizbesine sáikes bastalady.
Aita keteiik, irikteý sapasyn jaqsartý úshin aqyly bólimge magistratýraǵa túsý úshin shekti ball kóterildi. Memlekettik bilim berý tapsyrysy boiynsha jáne aqyly negizde ǵylymi-pedagogikalyq magistratýraǵa túsý úshin shekti ball – 75, beiindi magistratýraǵa túsý úshin 50 ball.
