Parlament «Ǵylym týraly» Zańǵa túzetýler qabyldady. Úkimettiń bastamashylyq etýimen ári Parlament depýtattarynyń qoldaýymen qabyldanǵan jańa túzetýlerde ǵylym salasyn qarjylandyrýǵa ózgertý engizý máselesi óz sheshimin tapty, dep habarlaidy Bilim jáne ǵylym ministri Ashat Aimaǵambetov Feisbýktegi paraqshasynda.
«Parlament «Ǵylym týraly» Zańyna túzetýlerdi qabyldady. Zańǵa engizilgen túzetýler ǵylym salasyn qarjylandyrý men qoldaý sharalaryn jaqsartýǵa baǵyttalǵan.
Buryn-sońdy ǵalymdardyń qatysýymen ótetin árbir kezdesýde ǵylymi zertteýlerdi qarjylandyrý merzimin 3 jyldan 5 jylǵa deiin ulǵaitý máseleleri kóteriletin edi.
Jalaqyny bazalyq qarjylandyrý tetigine tek basshylar men kómekshi qyzmetkerlerdi ǵana emes, sonymen birge ǵylymi qyzmetkerlerdi de qosý qajettiligi týraly másele jyldar boiy kóteriletin.
Gýmanitarlyq beiindegi ǵalymdarymyz (qazaq ádebieti, til bilimi, Qazaqstan tarihy, arheologiia, filosofiia jáne t.b.) osy baǵyttardy qarjylandyrý máselesine erekshe nazar aýdarý qajet ekendigin 10 jyldan astam ýaqyttan beri aityp keledi.
Endigi kezekte Prezidenttiń tikelei qoldaýynyń arqasynda jáne Qazaqstan halqyna Joldaýynda aitylǵan tapsyrmalarynyń nátijesinde atalǵan máselelerdiń barlyǵy Úkimettiń bastamashylyq etýimen ári Parlament depýtattarynyń qoldaýymen qabyldanǵan jańa túzetýlerde óz sheshimin tapty.
Qysqa merzim ishinde qajetti túzetýler ázirlenip, Parlamenttiń qaraýyna engizildi.
Bul degenimiz, kem degende 1600 ǵalym bazalyq qarjylandyrý sheńberinde turaqty negizde jalaqy ala bastaidy.
Al, gýmanitarlyq beiindegi institýttar tikelei qarjylandyrý sheńberinde tek granttyq jobalarǵa ǵana táýeldi bolmai, kerisinshe óz baǵyttary boiynsha zertteýler júrgizý úshin turaqty qarjylandyrylatyn bolady.
Sonymen qatar ǵylymi qaýymdastyq kóptegen jyldar boiy Ulttyq ǵylymi keńester jumysynyń obektivtiligin arttyrýǵa umtylyp keledi. Óitkeni biýdjettik qarjylandyrý týraly sheshimdi ǵylymi keńester qabyldaidy.
Sońǵy eki jylda atalǵan keńesterdiń jumysynda aitarlyqtai oń ózgerister oryn aldy. Ulttyq ǵylymi keńes sheshimderiniń barynsha negizdiligi men obektivtiligin qamtamasyz etý úshin zań júzinde apelliatsiialyq komissiia engizilip jatyr. Komissiia Ulttyq ǵylymi keńes sheshimderine qatysty ǵalymdardyń apelliatsiialary men Ádep kodeksin saqtaý máselelerin qarastyratyn bolady» - dep jazdy ol óz paraqshasynda.
