Búgin QR Premer-Ministriniń orynbasary Gúlshara Ábdiqalyqova bastaǵan Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý jónindegi úkimettik jumys toby Almaty oblysyna bardy, dep habarlaidy "Ult aqparat" primeminister.kz saityna silteme jasap.
Jumys tobynyń quramyna QR Eńbek jáne halyqty áleýmettik qorǵaý ministri Berdibek Saparbaev, QR Bilim jáne ǵylym ministri Kúlásh Shámshidinova, QR Densaýlyq saqtaý ministri Eljan Birtanov, Qurylys jáne turǵyn úi-kommýnaldyq sharýashylyq isteri komitetiniń tóraǵasy Marhabat Jaiymbetov kirdi.
QR Premer-Ministriniń orynbasary men QR Eńbek jáne halyqty áleýmettik qorǵaý ministri jumys saparyn Taldyqorǵan qalasynyń Jumyspen qamtý ortalyǵy men Halyqqa qyzmet kórsetý ortalyǵynan bastap, mekemelerdiń jumysyn tekserdi.
2018 jyly oblysta 8294 adam jumysqa ornalastyryldy, onyń 2681-i turaqty jumys tapty, 3248 adam tólenetin qoǵamdyq jumystarǵa jiberildi. Jumyspen qamtý ortalyǵynda ataýly áleýmettik kómekti taǵaiyndaý tártibi egjei-tegjeili qaraldy. Birqatar naqty tapsyrmalar berildi. Taldyqorǵan qalasynyń HQO-da 2018 jyly 234 myńnan astam qujat berildi, olardyń 59% elektrondy túrde usynylǵan.
Budan keiin jumys toby Almaty oblysynyń turǵyndarymen kezdesti. Jiynǵa kópbalaly analar, az qamtylǵan otbasylar, eńbek ardagerleri, múmkindikteri shekteýli jandar, muǵalimder, dárigerler, azamattyq qoǵam ókilderi qatysty.
Gúlshara Ábdiqalyqova óz sózinde jańa áleýmettik saiasattyń negizgi baǵyttary, jumys tobynyń maqsattary men mindetteri týraly tolyǵyraq aityp berdi.
Ol halyqtyń ál-aýqatyn jaqsartý maqsatynda qolǵa alynǵan sharalar týraly egjei-tegjeili baiandai otyryp, memlekettiń basymdyǵy halyqtyń turmys deńgeiin barynsha jaqsartý ekenin atap ótti.
Zalda kóterilgen suraqtarǵa jumys tobynyń músheleri naqty ári tolyq túsinikteme berdi.
Kezdesý aiaqtalǵannan keiin Vitse-premer tsifrlyq saýattylyqty damytýǵa baǵyttalǵan №28 AT-litsei mektebine bardy. Munda 1,3 myńnan astam oqýshy bilim alyp jatyr. Mektep zamanaýi jabdyqtarmen jabdyqtalǵan. Onda informatika, psihologiia, lingafondyq jáne mýltimedialyq kabinetter, oqý sheberhanalary bar.
Budan keiin G. Ábdiqalyqova az qamtylǵan otbasylarmen kezdesti. 5 bala tárbielep, balabaqshada tárbieshi kómekshisi bolyp jumys isteitin kópbalaly ana T. Bekberdinovanyń páterinde bolǵan Premer-Ministrdiń orynbarasy ataýly áleýmettik kómektiń jańa tetigin túsindirdi. Oǵan sáikes bul otbasy endi ai saiyn 141 125 teńge alatyn bolady.
Birinshi jumys kúniniń sońynda G. Ábdiqalyqova azamattardy jeke qabyldady. Atap aitqanda, S. Turashtyń tabysy tómen otbasynyń ótinishi qanaǵattandyryldy, ol óz úiinde tigin isin ashqysy keledi jáne qarjylandyrýǵa muqtaj. Óńir basshylyǵyna 505 myń teńge kóleminde óteýsiz grant berý máselesin sheshý tapsyryldy.
Mal sharýashylyǵymen ainalysýǵa sheshim qabyldaǵan S. Kúmisbek shaǵyn nesie berýdi surady. Bul másele de oń sheshimin tapty - oblys basshylyǵy oǵan shaǵyn nesie bóledi.
Jumys tobynyń basqa músheleri oblys aýdandary boiynsha saparlarda boldy. QR Densaýlyq saqtaý ministri Eljan Birtanov Eskeldi aýdanynda, QR bilim jáne ǵylym ministri Kúlásh Shámshidinova Kóksý aýdanynda, Qurylys jáne turǵyn úi-kommýnaldyq sharýashylyq isteri komitetiniń tóraǵasy Marhabat Jaiymbetov Taldyqorǵan qalasynyń jáne Tekeli qalasynyń qurylys jáne TKSh nysandary boiynsha jumys saparynda boldy.
Densaýlyq saqtaý, bilim berý nysandaryn, basqa da áleýmettik mekemelerdi, qurylys alańdaryn aralai otyryp, aýyl turǵyndary, muǵalimder jáne dárigerlermen áńgime órbidi. Halyqtyń jeke qabyldaýy ótti, onda azamattar ózekti suraqtarǵa tolyq jaýap aldy, sonymen qatar olardyń túiitkildi problemalaryn sheshýge kómek kórsetildi.
Úkimet músheleriniń Almaty oblysyna jumys sapary jalǵasady.
Aita keteiik, buǵan deiin QR Densaýlyq saqtaý ministri E. Birtanovtyń jergilikti meditsina qyzmetkerlerimen kezdeskenin jazǵan bolatynbyz.
